Ukrayina prezidenti Volodımır Zelenskıy iyünniñ 24-25-nde Gaagada keçirilecek NATO sammitinde ABD prezidenti Donald Trumpnen körüşmege planlaştıra. Bu aqta o, Sky News telekanalına bergen intervyüsında ayttı.
«E, planlaştıram. Nasıl olacaq bilmeyim, doğrusını aytqanda. Taqımlarımız çalışa, ebet, biz körüşmege azırlanamız», – dep cevap berdi Zelenskıy jurnalistniñ NATO sammitinde Trumpnen körüşmege planlaştıramı sualine.
Bu körüşüv keliştirildimi Zelenskıy taqımlar vaqtını muzakere ete, dep cevap berdi.
Ukrayina prezidenti ofisindeki menba AFPge bildirgenine köre, «taqımlar tafsilâtlarnı belgilep añlaşa». Menbanıñ malümatına köre, muzakereler Felemenkte «üyleden soñ erte» keçirilecek ve Rusiyege qarşı sanktsiyalar ve Kyiv içün silâ alınmasınen bağlı olacaqtır.
Washington bu körüşüv aqqında şimdilik bildirmey.
NATO sammiti iyünniñ 24-25-nde Gaagada ötkerilmeli.
Ukrayina prezidenti Volodımır Zelenskıy, Azatlıq Radiosınıñ subetdeşleri bildirgenine köre, iyünniñ 24-nde aqşam liderlerniñ iş yemeginde iştirak etecek. Anda ABD prezidenti Donald Trump da olmaq kerek. Volodımır Zelenskıy sammitte keçirilgen tedbirde – Mudafaa sanayı forumında çıqışta bulunmaq kerek.
Bu ay Volodımır Zelenskıy Kanadada «Yedi gruppası» (G7) sammitinde Donald Trumpnen körüşmek kerek, amma Trump sammitni terk etti ve körüşüv olmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
