Ukrayina prezidenti Volodımır Zelenskıy Amerika lideri Donald Trumpnen avgustnıñ 18-nde Washingtonda körüşip, işğal etilgen Qırım meselesini muzakere etti. Zelenskıynıñ aytqanına köre, bu «eñ büyük mesele» oldı.
«Qırım aqqında çoq laf ettik, hususan haritağa baqıp. Men eñ büyük mesele olğanını qayd ettim. O, (Trump – QA) Ukrayinanıñ çıqqanı, söz sırası, onıñ fikirince, büyük hata edi, dep ayttı. Onıñ qayd etkenine köre, Qırım – büyük cenk içün bir anahtar. Ve o, Obama bu imkânnı bermegen olsa edi, Putin Qırımnı ve qısmen Donbasnı işğal etip olamasa edi, büyük cenkni başlatmaz edi, dep ayttı o», – dep ayta Zelenskıynıñ aytqanlarını «Suspilne».
O, Qırım işğali Rusiyege yarımadanı askeriyleştirmege ve onı «2022 senesi büyük istilâ içün bir platsdarm» yapmağa imkân berdi, dep bildirdi.
«Men Putin Qırımnı askeriyleştirdi, onı platsdarm olaraq cenübiy operatsiya içün qullandı, dep ayttım. Men Qırım rusiyeliler tarafından işğal etilgende kimse – ne Birleşken Devletlerde, ne dünyada – Rusiyege qarşı tesir ete bilgen küçlü sanktsiyalar kirsetmedi, dep ayttım. Şunıñ içün kerçek basqı ve telükesizlik kefaletleri pek müim», – dep qoştı Zelenskıy.
Trump Rusiye ve Ukrayina arasında barışıq añlaşmasını tizüv imkânını izaatlap, Kyiv Qırımnı qaytarmaq ümütinden, NATO arbiy itiffaqına qoşulmaq ıntıluvından vazgeçmege mecbur olacaq, dep ayttı.
Reuters agentligi menbalarına esaslanıp, Rusiye prezidenti Vladimir Putin ABD prezidenti Donald Trumpnen körüşip, Ukrayinada cenkni toqtatuv añlaşması çerçivesinde işğal etilgen Qırımda Rusiye suverenitetini tanımağa talap etken eken, dep yazğan edi.
