«Qırım – Ukrayinağa ait bir yarımadadır. Trump bu meseleni kötermedi. Bir kere laf etken edik, ğaliba, sentâbr ayında New Yorkta, bu vaziyet nedir dep meraqlanğan edi», – dedi Zelenskıy Norvegiya baş naziri Yonas Gar Stere ile körüşken soñ bergen matbuat konferentsiyasında.
Zelenskıynıñ aytqanına köre, bu subette o, Trumpqa «ukrayinalılar Qırımnı ne içün o qadar seve» ve yarımada Ukrayinasız «ölgenini» añlattı, çünki yarımada iqtisadiy ve içtimaiy ceetten Ukrayinağa bağlı.
«Qırım – unikal tabiat, turizmdir. Turizm içün eñ müimi nedir? Turistler. Qırımda 11 yıldan berli turist yoq. Qırımğa yazda 3 million turist kele edi. Eki million sekiz yüz biñ – ukrayinalılar», – dep qayd etti Zelenskıy.
O, ukrayinalılar Qırımda «olarnıñ yarımadası» olğanı içün raatlanğan edi, dep qoştı.
Semafor neşiri menbalarına esaslanıp, Beyaz saray barışıq añlaşması çerçivesinde Qırımnı Rusiye dep tanıma imkânını baqa, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
