«Toqtamayıp ayta bilemiz, amma bu böyle çalışmay. Böyle bir tecribemiz oldı, yardım etmedi. Putin bu añlaşmalarnı 25 kere bozdı. Bizim ükümetimiz vaqtında olmadı, başqalarınen oldı, amma bozdı, prezident edi. Şu sebepten ateşni toqtatmaycaqmız», – dedi Zelenskıy Beyaz sarayda.
Ukrayina prezidentiniñ bildirgenine köre, ABD, olarnı Avropadan okean ayırsa da, cenk aqibetlerini is etecek. Trump ise cevap berip, «siz bunı bilemezsiñiz, ne is etecegimizni bizge aytmañız».
«Meseleñizni şiir kibi çezmege tırışamız. Fikriñizni bizge qabul ettirmeñiz. Vaziyetiñiz yahşı degil, eliñizde kart yoq», – dedi o.
Buña Zelenskıy «mında kart oynamağanını» aytıp cevap berdi. Vance «ne yapacağımıznı aytamazsıñız» dep, Zelenskıynıñ 2024 senesi sentâbr ayında Pennsylvania ziyareti aqqında hatırlattı.
Cuma künü Volodımır Zelenskıy siyrek topraq qazıntıları añlaşmasını imzalamaq içün Washingtonğa keldi.
Fevralniñ 25-nde belli olğanına köre, Kyiv faydalı qazıntılar añlaşmasınıñ şartlarını Washingtonnen keliştirdi. Qayd etilgenine köre, añlaşma imzalanması içün Ukrayina prezidenti Volodımır Zelenskıy fevralniñ 28-nde ABDde olacaq.
Ay başında ABD prezidenti Donald Trump Ukrayinanen ABDge elektronikada qullanılğan siyrek topraq minerallarına irişmege imkân berecek añlaşma aqqında añlaşmağa istegenini bildirdi. Trump Kyivge berilgen ve 500 milliard dollar olaraq esaplanğan yardımnı bu şekilde qaytarmağa planlaştırğanını ayttı.
Kyiv resurs añlaşması leyhasınıñ ilk variantını red etken soñ, Trump, ABD köstergen yardımnıñ miqdarı tahminen 100 milliard dollar olğanını aytqan Ukrayina prezidenti Volodımır Zelenskıynı sert bir şekilde tenqit etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
