Dekabrniñ 28-nde Floridada ABD prezidenti Donald Trumpnen körüşüvde Rusiye-Ukrayina cenkinde barışıq añlaşmasınıñ tizilüv imkânlarınen bağlı meseleler muzakere etilecek. Bu aqta dekabrniñ 26-nda Ukrayina prezidenti Volodımır Zelenskıy jurnalistlerniñ suallerine cevap berip tarif etti.
"Kün tertibimiz keniş. Bu bazar künü Floridada prezident Trumpnen körüşüvimiz olacaq, dep tüşünem. Bu vesiqalarnı muzakere etecekmiz – telükesizlik kefaletleri, bu blokta bir qaç vesiqa bar, ve episini muzakere etmege imkân tapmaq kerek, soñra – iqtisadiy añlaşmalar, anda şimdilik temeller bar, bir qaç añlaşma olacaq, mında yönelişini muzakere etmek kerek… Bu körüşüv (bu vesiqalarnı) yapa bilgenimiz qadar azırlamaq içün yapıla", – dedi Ukrayina devlet yolbaşçısı.
Zelenskıy dekabrniñ 26-nda saba Trumpnen "eñ yaqın vaqıtta" körüşmege añlaşqanını bildirdi. Bunıñ içün ABD prezidentiniñ taqım vekilleri Steve Wittkoff ve Jared Kushnernen telefon subeti oldı.
Bu afta Ukrayina prezidenti Volodımır Zelenskıy Kyiv ve Washington arasında azırlanğan 20 maddelik bu plannı "cenkni bitirüvnen bağlı temel vesiqa" dep adlandırdı. Onıñ aytqanına köre, planda Ukrayina qaviy telükesizlik kefaletlerini alır, Ukrayina Silâlı quvetleriniñ sayısı barışıq vaqtında 800 biñ kişi olur, dep közde tuta.
Rusiye akimiyetiniñ vekilleri bu plannı resmiy şekilde izaatlamadı.
Rusiye akimiyeti Ukrayina ve ABD muzakereleri neticesinde azırlanğan 20 maddelik barışıq planına "esas deñişmelerniñ" kirsetilüvini talap etecek, dep haber ete Bloomberg Kremlge yaqın menbağa esaslanıp.
