Ukraiyna prezidenti Volodımır Zelenskıy Saudiy Arabistannıñ printsi Muhammad bin Salman Al Saudnen körüşti, dep bildirdi martnıñ 11-nde Ukrayina prezidenti ofisiniñ matbuat hızmeti.
«Kün tertibiniñ esas meselelerini muzakere ettik – em eki taraflama, em diger ortaqlarnen. Muhammad bin Salan Al Saudnıñ kerçek barışıqnı yaqınlaştırmağa yardım etken ğayretlerini qayd ettik. Saudiy Arabistan diplomatiya içün pek müim meydançıq bere, ve biz bunıñ qıymetini bilemiz», – dep aytıla haberde.
Zelenskıynıñ qayd etkenine köre, Ukrayina taqımı Ciddada Amerika taqımınen çalışmaq içün qala: «Kerçek neticege ümüt etemiz. Körüşüvde Ukrayinanıñ fikri konstruktiv olacaq», – dep qoştı Zelenskıy.
«Muhammad bin Salman Al Saudnen cenkni bitirecek ve barışıqnı devamlı yapacaq adım ve şaraitlerni tafsilâtlıca muzakere ettik. Esirlerniñ azat etilüvi ve balalarnıñ qaytarıluvını qayd ettik, bu adımlar diplomatik ğayretlerge işançnı pekitmek içün esas tedbirlerden biri ola bile. Subetniñ büyük qısmını telükesizlik kefaletleriniñ formatlarına bağışladıq», – dep aytıla haberde.
Muzakerelerde taraflar eki dost memleket arasındaki eki taraflama munasebetlerniñ aspektlerini, em de Ukrayinadaki soñki vaqialarnı muzakere ettiler.
Martnıñ 11-nde Saudiy Arabistanda Ukrayina ve Amerika eyyetleri arasında muzakereler olacaq.
Ukrayinanı muzakerelerde Andriy Yermak, prezident ofisiniñ yolbaşçısı, Tış işler naziri Andriy Sıbiğa, Mudafaa naziri Rustem Umerov ve Prezident ofisiniñ yolbaşçı muavini Pavel Palisa temsil etecekler.
ABD tarafından körüşüvge Beyaz saraynıñ milliy telükesizlik mesleatçısı Mayk Uolts, ABD devlet kâtibi Marko Rubio kelecekler.
Yaqın Şarqta ABD vekili Stiv Uitkoff bildirgenine köre, Saudiy Arabistandaki muzakereler barışıq añlaşması ve ateş toqtatıluvı içün çerçivelerni belgilemeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
