«Er kün Ukrayinada – çoqusı «şahed» olğan darbe dronlarınen büyük ücümler. Böyle darbe dronlarını yapmasını Rusiyege İran ögretti», – dep yazdı o, Telegram kanalında.
Zelenskıy Harkivge qarşı çarşenbe aqşamı rus dronlarınıñ ücümi aqqında hatırlattı. Yaralanğan sekiz kişi aqqında malümat bar, biri 12 yaşında qızçıq.
«İç bir memleket bundan keçmemeli. Ve bu vaziyette Rusiyege qarşı basqı yımşatıluvı, sanktsiyalarnıñ lâğu etilüvi ve ilâhre aqqında aytmaq yersiz ve faydasız», – dep ayttı o.
Ukrayina devletiniñ yolbaşçısı emin ki, Rusiye ABDniñ şartsız ateşkes teklifi «yarım aydan berli masada» olğanını qayd etip, cenkni uzata:
«İnsanlarnıñ ayatlarını qurtarmaq ve diplomatiyanıñ tez ve tolu çalışması içün Rusiyege qarşı basqı kerek. Rusiyege basqı yapılmasa, netice olmaz».
Martnıñ 26-nda aqşam Rusiye ordusı Harkivge dronlarnen ücüm etti. Neticede yerli akimiyet yaralanğan sekiz kişi aqqında bildirdi. Dronlarnıñ ücümi Dniproda yanğın sebebi oldı, dep bildirdi vilâyet yolbaşçısı Serğiy Lısak.
Frenkistan prezidenti Emmanuel Makron bildirgenine köre, şimdi Rusiyeniñ cenkni bitirüvde «müim bir etap», amma Moskva kerçekten barışıq istegenini köstermey.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
