Rusiye ordusı dekabrniñ 29-nda Ukrayınağa qarşı tahmin 110 raketa uçurdı, dep haber ete Ukrayına prezidenti Volodımır Zelenskıy. Onıñ aytqanına köre, çoqusını ava mudafaa quvetleri urıp tüşürdi.
«Loqsahane, oquv yurtları, alış-veriş merkezi, çoq qatlı binalar ve mustaqil evler, ticaret anbarı, park yeri. Kyiv, Lviv, Odesa, Dnipro, Harkiv, Zaporijjâ ve diger şeerler. Bugün Rusiye elinde olğan aman-aman er şeyni qullandı: «Kinjallar», S-300, qanatlı raketalar, uçucısızlar. Strategik bombardımanlar H-101/H-505 qullandı. Tahminen 110 raketa uçurıldı, çoqusı tüşürildi», – dep aytıla Zelenskıynıñ Telegramında.
Onıñ qayd etkenine köre, Ukrayına Rusiye darbelerine cevap berecek. «Ve biz memleketimizniñ telükesizligini, er bir şeerniñ, er bir halqnıñ telükesizligini temin etmek içün küreşecekmiz. Rusiye terrorı yeñilmeli – öyle de olacaq», – dep qayd etti prezident.
Gece ve saba Rusiye Ukrayınağa kene dron ve raketalarnen ücüm etti. Lviv, Kyiv, Harkiv, Dnipro ve Çerkası, Sumı, Odesa vilâyetlerinde patlavlar aqqında haber etildi. Bazı şeerlerge saba bir qaç kere ücüm etildi.
Ukrayına baş naziri Denis Şmığal bildirgenine köre, Rusiyeniñ Ukrayınağa qarşı büyük ücümi içtimaiy ve kritik infrastrukturağa qarşı yapıldı.
«Dnipropetrovsk vilâyetinde loqsahane ve alış-veriş merkezine ücüm etildi. Harkivde ücüm neticesinde elektrik problemleri peyda oldı. Lvivde, Sumı vilâyetinde ve Odesada mesken evler zarar kördi. Kyivde «Lukyanivska» metro stantsiyasınıñ binası ve bir qaç rayonda mesken evler zarar kördi. Lviv, Zaporijjâ ve Kyiv vilâyetlerinde de zararlar bar», – dep qayd etti o.
Ukrayına İç işler nazirliginiñ malümatına köre, darbe neticesinde 12 insan elâk oldı, tahminen 70 kişi yaralandı.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayına şeerlerine muntazam sürette ateş aça. Delil ve şaatlıqlarğa baqmadan, Moskva Ukrayınada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
