Ukrayına prezidenti Volodımır Zelenskıy noyabrniñ 20-de Frankofoniyanıñ frenk tilli memleketleriniñ halqapa teşkilâtınıñ konferentsiyasına muracaatta bulunıp, Rusiyeniñ Ukrayınağa atqan raketalarnıñ sayısını seslendirdi.
«Rusiye 4700-den çoq raketa qullandı. Yüzlernen şeerimiz yaqıldı. Biñlernen insan can berdi. Yüz biñlernen insan Rusiyege sürgün etildi. Millionlarnen kişi cenkten qaçıp, Ukrayınadan diger memleketlerge ketti», – dedi Ukrayına prezidenti.
O, noyabrniñ 15-nde Rusiye ordusı Ukrayına mesken yerlerine tahminen 100 raketa attı, dep hatırlattı. Neticede tahminen 20 million kişi ışıqsız qaldı.
Noyabrniñ 15-nde Rusiye Hazar deñiziniñ şimalinden, Rostov vilâyeti ve Qara deñizden 90-dan çoq raketa atıp, Ukrayınanı büyük raketa darbesine oğrattı. Çoqusı raketanı Ukrayına ava mudafaa sisteması tüşürdi. Rusiye Mudafaa nazirligi noyabrniñ 15-nde Ukrayınağa ateş etkenini tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
