Ukrayına prezidenti Volodımır Zelenskıy Rusiyeniñ tam istilâsı başlağanınıñ yılını «ağrı, acınuv, işanç, birlik ve yeñilmezlik yılı» dep adlandırdı.
«Fevralniñ 24-nde millionlarımız bir saylav yaptı: beyaz bayraq degil, mavı-sarı bayraq. Qaçmaq degil, körüşmek. Duşmannen körüşmek. Tirenüv ve küreş. Ağrı, acınuv, işanç, birlik ve yeñilmezlik yılı oldı. Bu zaferimizniñ yılı olacaq, bilemiz», – dep yazdı o, Facebook saifesinde.
Bugün Volodımır Zelenskıynıñ Rusiyeniñ Ukrayınağa qarşı tam istilâsınıñ yılına bağışlanğan matbuat konferentsiyası olacaq.
Bıltır fevralniñ 24-nde Rusiye bütün sıñırda ve Beyazrusiyeden Ukrayınağa tam istilâ başlattı. Ukrayına Silâlı quvetleriniñ Baş ştabı malümatına köre, Rusiye bu vaqıt devamında Ukrayınağa aman-aman beş biñ raketa attı.
BM eñ az 8006 vatandaşnıñ ölümini qayd etti – daa 13 287 kişi soñki 12 ayda yaralandı. Teşkilât kerçek raqamlar daa yüksek, dep qayd ete.
Kreml istilânı inkâr etip, yapqanlarını «mahsus arbiy operatsiya» dep adlandıra. Onıñ maqsadı olaraq ise «Ukrayınanıñ askeriylesizleştirilüvi ve denatsifikatsiyası» ola eken.
Ukrayına Silâlı quvetleriniñ vekili Yuriy İgnat Arbiy ava quvetleri fevralniñ 23-24-nde Rusiyeniñ provokatsiyalarını bekley, dep ayttı. Onıñ bildirgenine köre, Ukrayına arbiyleri quvetleştirilgen nevbetçilik tuta.
Ukrayına Mudafaa nazirliginiñ Baş istihbarat idaresiniñ yolbaşçısı Kırılo Budanovnıñ fikirince, Rusiye fevralniñ 24-ne «büyük olmağan raketa darbesini» planlaştıra bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
