Ukrayina prezidenti Volodımır Zelenskıy yanvarniñ 13-ne keçer gecesi Rusiyeniñ Ukrayinağa qarşı soñki kütleviy ücümini izaatladı.
O, darbeniñ esas nişanı kene energetika oldı, dep qayd etti – generatsiya, aststantsiyalar, mesken ve vatandaş infrastrukturası da zarar kördi.
"Dnipropetrovsk, Jıtomır, Zaporijjâ, Kyiv, Odesa, Sumı, Harkiv, Donetsk vlâyetlerii darbege oğradı. Harkiv vilâyetindeki Korotıçte iç bir arbiy manası olmağanda poçta terminalına raketalarnen ücüm etip, 4 insannı öldürdiler. Tuvğanları ve yaqınlarına taziyelerimni bildirem", – dedi o.
Prezident Kyiv vilâyetinde zor bir vaziyet devam ete, dep qoştı – bir qaç yüz biñ qoranta elektriksiz qaldı. Yerlerde acele hızmetler çalışa, mahsus noqtalar açıldı.
"Ayatqa qarşı er bir darbe – Ukrayinağa yardım kösterilmesi toqtatılmamalı dep hatırlata. Ava mudafaasınıñ raketaları er kün kerek, hususan qışta. Dünya Rusiyeniñ bu terrorına Ukrayinağa yañı yardım paketlerinen cevap bere bile", – dep tüşüne Ukrayina devletiniñ yolbaşçısı.
O, Amerika Birleşken Devletleri ve Avropa belgilegen yardım ketirilmesiniñ tezleştirüvine ümüt etkenini bildirdi.
"Rusiye suvuq cenkte ğalebe qazanmağa yardım etemeycegini añlamaq kerek. Yardım etken er keske teşekkürler", – dep qoştı Zelenskıy.
Ukrayina Silâlı quvetleriniñ Ava küçleri haber etkenine köre, Rusiye ordusı Ukrayinağa yanvarniñ 13-ne keçer gecesi 25 raketa ve 293 darbe uçucısızınen ücüm etti. Bir qısmı işğal etilgen Qırım yarımadasından uçurıldı. Ukrayina Ava mudafaasınıñ quvetleri 7 raketa ve 240 uçucısıznı zararsız alğa ketirdi. DTEK şirketi issilik elektrik stantsiyası zarar kördi, dep bildirdi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
