Ukrayina prezidenti Volodımır Zelenskıy Yuqarı Baş Komandan Ştabınıñ toplaşuvını keçirdi – bu aqta o, martnıñ 7-nde aqşam hitabında bildirdi.
O, martnıñ 7-nde saba Rusiyeniñ ava ücümi vaqtında ava mudafaa işinen bağlı edi. Böyle toplaşuvlar er bir büyük darbeden soñ keçirile, dep qayd etti Ukrayina prezidenti:
«Biz zayıf yerlerni ve paylaşılacaq tecribeni tapamız. Bugün bütün kerekli maruzalar bar edi. Ayrı diqqat – ava mudafaamıznıñ semereli qullanıluvıdır. Umumen bu darbede rusiyeliler 260 ava ücüm vastasını qullandı: qanatlı ve ballistik raketalar, darbe dronları. Arbiylerimiz darbege professional cevap berip oldı».
Zelenskıynıñ qayd etkenine köre, Rusiyeniñ Ukrayina energetika sistemasına ücümi «er vaqıttaki kibi, alçaq ve tsinik bir şekilde, sanki Ukrayina ve dünya bu cenkni bitirmek içün bir şey yapmay kibi» yapıldı.
«Ukrayina barışıqqa azır – biz tam adımlar teklif ettik. Ve er kün yañı Rusiye darbeleri ve aqiqat şunı isbatlay ki, aynı Rusiyeni barışıqqa – cenkni toqtatmağa, aqiqiy diplomatiyağa, havfsızlıqnı ve işançlı ve devamlı barışıqnı teminlemege mecbur etmek kerek», – dedi o.
Prezidentniñ hatırlatqanına köre, Ukrayina ve ABD barışıq içün Saudiy Arabistanda körüşüvni keçirmege planlaştıra. Bundan ğayrı, onıñ aytqanına köre, bugün kün devamında ABD prezidenti Donald Trumpnıñ taqımınen «bütün vaqıt devamında eñ intensiv iş» devam etti.
«Telefon eteler. Mevzu belli – tezce barışıq, qaviy telükesizlik. Ukrayina konstruktiv baqa», – dep qoştı o.
Martnıñ 7-nde saba Rusiye ordusı Ukrayinağa kütleviy ücüm başlattı. Ukrayina aviatsiyasınıñ malümatına köre, Rusiye ordusı çeşit türlü 67 raketa ve 194 ücüm uçucısızı ve çeşit türlü dron imitatorlarınen ücüm etti. Rusiye ücüminiñ esas nişanı Ukrayinanıñ gaz çıqaruv obyektleri edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
