«Olar (muzakereler – QA) umumen siyasiy mabüslerimizniñ, hususan qırımtatarlarnıñ azat etilüvine zor kete. Cenk esirleri deñiştirile, çünki olarnı cenk esirlerine deñiştirmege imkânımız bar. Qırımtatarlarnen, añlaysıñızdır, olarnı qanunsız bir şekilde tutalar», – dep qayd etti Ukrayina prezidenti «Qırım platforması» sammitinde çıqışta bulunıp, dep haber ete Qırım.Aqiqat mühbiri.
Onıñ aytqanına köre, «er kes» formatında deñişüv yapmaq içün Ukrayinanıñ bütün ortaqları Rusiyege basqı yapmalı.
«Başqa türlü bunı yapmaq zor. Ortaqlarımız vastasınen çalışamız. Bilesiñiz, em Emirlikler, em Qatar, em Türkiye yardımınen çalışamız. Azerbaycannen çalışamız. Büyük temsilcilikleri ve büyük tesiri, hususan musulman olğan memleketlernen çalışamız. Amma şimdilik olğan muvafaqiyet bu», – dedi Volodımır Zelenskıy.
Mart ayında Volodımır Zelenskıy Türkiye prezidenti Recep Tayyip Erdoğanğa Rusiye tutqan qırımtatarlarnıñ cedvelini berip, Ukrayina ukrayinalı siyasiy mabüsler ve esirlerni azat etüvde Türkiyeniñ vastalığına ümüt ete, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
