ABD lideri Donald Trump fevralniñ 21-nde cenkni toqtatmaq içün Ukrayina prezidenti Volodımır Zelenskıy ve Rusiye prezidenti Vladimir Putin «körüşmege mecbur olacaqlar», dep bildirdi.
«Prezident Putin prezident Zelenskıynen körüşmege mecbur olacaqlar, dep tüşünem. Çünki bilesiñizmi? Millionlarnen insannıñ öldürilüvini toqtatmağa isteymiz», – dedi Trump Beyaz saraydaki jurnalistlerge.
«Añlaşma tizmege fırsatımız bar, dep tüşünem. Rusiye bunı yapmağa istegeninden emin olmaq kerek edim», – Saudiy Arabistada Er-Riyadda keçirilgen Amerika ve Rusiye diplomatlarınıñ körüşüvini aytıp dedi Trump.
Trump, ABD Ukrayina ile faydalı qazıntılar aqqında añlaşma imzalamağa yaqınlar, dep ayttı.
«Mence, bayağı yaqınmız, ve bunı isteyler, dep tüşünem. Bu müim. Bu büyük iş», – dedi o.
Trump, Ukrayina cenkini bitirmek içün tez añlaşma yapmağa çağıra ve bu afta eki lidernen de ayrı subetler keçirdi.
Zelenskıy aqşamki hitabında faydalı qazıntılar añlaşmasını añıp, adaletli neticege ümüt etecegini ayttı.
Cuma künü ABD prezidenti Donald Trump Fox Radioğa intervyü berip, Zelenskıynı kene tenqit etti, muzakereler içün «kartları qalmadı», dep ayttı. ABD prezidenti Zelenskıy muzakereler vaqtında körüşüvlerde iştirak etmek kerek dep tüşünmegenini tarif etti.
«O, üç yıl devamında körüşüvde oldı, ve bir şey yapılmadı. Şunıñ içün bunıñ pek müim olğanını tüşünmeyim – körüşüvlerde olmaq. Añlaşmağa mania ola», – dedi Trump.
İntervyüda o, Putinnen muzakerelerniñ neticelerinden memnün olğanını aytıp, Ukrayina ile muzakereler bu qadar yahşı olmadı, dep qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
