Ukraina prezidenti Volodımır Zelenskıy «insanlarnıñ ölmesini toqtatmaq içün» Vladimir Putinge muzakereler masasına oturmağa teklif etti. Ukraina devlet yolbaşçısınıñ ofisi Zelenskıynıñ yañı muracaatını Telegram-kanalında derc etti.
«Bütün Ukrainada uruşlar kete. İnsanlarnıñ ölmesini toqtatmaq içün muzakereler masasına oturayıq», – dedi Ukraina prezidenti.
Zelenskıy, Rusiyeniñ Ukrainağa ücüm etkenini «ücüm» degil, «Avropağa qarşı cenkniñ başlanğıçı» dep adlandırdı.
«Avropa birligine qarşı. Avropada esas insan aqlarına qarşı. Qıtada beraber yaşav qaidelerine qarşı. Avropa devletleriniñ sıñırlarnı küçnen bölmege istemegenlerine qarşı», – dep bildirdi o.
Ukraina prezidenti Avropanı Ukrainağa daa faal yardım etmesine çağırdı: «Bizge o qadar yavaş yardım etseñiz, özüñizni nasıl qorçalaycaqsıñız?» Zelenskıy avropalılarğa da muracaat etip, olar Ukrainağa kele ve Avropanı «biznen beraber» qorçalay bile, dep bildirdi.
«Avropadaki devlet institutsiyaları kerçekten qattı qararlarnen aşıqmağanda er bir avropalı öz paytahtında elçihanemizge kelip, yardımını teklif ete bile. Ükümetleriñizden Ukraina daa çoq alsın, dep talap etiñiz. Daa çoq maddiy, daa çoq arbiy yardım, çünki bu yardım sizge yardım, Avropağa yardımdır. Özüñizge yardım etesiñiz. Avropada cenk tecribeñiz olsa ve siyasetçilerniñ qararsızlığına baqıp oturmağa istemeseñiz, memleketimizge kelip, Avropanı qorumañız mümkün, şimdi bu pek kerek», – dep ayttı Ukraina prezidenti.
Fevralniñ 24-ne keçer gecesi Rusiye prezidenti Vladimir Putin Ukrainanıñ «denatsifikatsiyası ve askersizleştirüvi» maqsadınen «mahsus arbiy operatsiya» başlana, dep ilân etti. Birden Kyiv, Harkiv, Odesa, Kramatorsk, Berdânskta patlavlar ve raketa darbeleri aqqında haberler kelip başladı. Rusiye ordusı Ukrainanıñ beş vilâyetinden sıñırdan keçti.
Çerniğiv, Harkiv ve Kyiv vilâyetleri, Kyiv, Dnipro, Mıkolayıv ve Çerkası vilâyetlerinde komendant saatı ilân etildi.
Uruşlarnıñ ilk künü 137 Ukraina arbiyi elâk oldı, dep bildirdi Ukraina prezidenti.
Avropa Birliginiñ aza memleketleri Rusiyeniñ Ukrainağa kerçekleştirgen ücümi sebebinden yañı paketni tasdıqladı.
Rusiyege qarşı yañı sanktsiyalar paketi aqqında Büyük Britaniya, ABD, Kanada, Yaponiya bildirdi, Çeh Cumhuriyeti, Latviya ve Litvaniya rusiyelilerge viza bermey.
