Ukrayina prezidenti Volodımır Zelenskıy Rusiye prezidenti Vladimir Putinge açıq mektübini aydınlatıp, "körüşüv kününi"" belgilemege teklif etti.
"Körüşüvimizniñ tam kününi belgilemege teklif etem. Alâskada sizge Ukrayina ve Avropanen bağlı bazı şeylerniñ çezilmesini vade ettiler, dep eşittik. Amma köresiñiz, Ukrayina ve Avropa meseleleri Anchoragede al etilmey", – dep aytıla mektüpte.
Zelenskıynıñ qayd etkenine köre, "bizim aramızda başlatılğan eki taraflı trekke" diger iştirakçiler – Avropa ve ABD qoşu bileler.
Onıñ aytqanına köre, şimdiki cebe çizgisi – "diplomatiyanıñ başlaması kerek olğan çizgidir". O, Ukrayinanıñ muzakere vaqtında ateşni bütünley toqtatmağa azır olğanını bildirdi.
"Bu standart bir areket, İran etrafındaki vaziyet de bunı tasdıqlay. Kerçek sessizlik yapmağa tırışuv – bir-birinen laf etmege başlamaq içün eñ yahşı başlanğıçtır. Bu tek tırışuv degil, isteseñiz, ateşniñ kerçek toqtatılması olacaq, dep tüşünemiz", – dep aytıla mektüpte.
Zelenskıynıñ hatırlatqanına köre, çizgide ateş toqtatılğanınıñ monitoringini Amerika Birleşken Devletleri temin ete bile.
Onıñ qayd etkenine köre, Ukrayina "er kesni er keske" şeklinde cenk esirlerini deñişmege azır, ve cenk vaqtında çıqarılğan vatandaş ve balalarnı qaytarmaq içün ciddiy adımlar atmaq kerek, dep hatırlattı.
"Şahsen siz aqlıñıznen cenkni bitirmek kerek fikrine kelmeseñiz, Ukrayina bar oluv küreşini devam ettirecek. Bizge qoltutqanlar olacaq. Amma siz de sağ qalmaq içün daa çoq küreşmege mecbur olacaqsıñız – Rusiye degil, şahsen siz. Bu menim ya da Ukrayinanıñ qorquzuvı degil. Bu siz yahşı bilgen Rusiye tarihınıñ kerçekleridir: Rusiye boldursa, deñişmeler ola. Biz boldurtmaq içün çalışa bilemiz. Siz cenkiñizni toqtata bilesiñiz", – dep qoştı Zelenskıy.
Rusiye prezidenti Vladimir Putin Rusiye Anchoragede ABD prezidenti Donald Trump ile muzakere etilgen teklifler esasında cenkni barışıq yollarınen toqtatmağa azır, dep bildirdi. Putin Kyiv muzakere etilgen uzlaşuvlarğa razı olsa, zıddiyet pek tez bite bile, dep fikrini ayttı.
O, Rusiyeniñ Donbas kontroli Ukrayina añlaşmasına zıt kelmey, dep qayd etti.
"Birinciden, bir-birine ters kelmeyler – bütün Donbas regionını kontrol etmek ve "añlaşma" tizmek bir-birine zıt degil", – dedi Putin halqra haber agentlikleriniñ reberlerinen körüşkende.
Mayısnıñ 7-nde Putinniñ yardımcısı Yuriy Uşakov Ukrayina Donbastan arbiylerini çıqarmasa, Rusiye Moskva, Kyiv ve Washington iştirakinen üç taraflı muzakerelerniñ yañı raundında bir mana körmey, dep ayttı.
Aynı vaqıtta, ABD devlet kâtibi Marco Rubio mayısnıñ 14-nde Washington Ukrayina ve Rusiye barışıq muzakereleriniñ yañıdan başlamasına ümüt ete, aracı olmağa azır, dep bildirdi.