Ukrayina prezidenti Volodımır Zelenskıy Frenkistanda ortaq memleketlerniñ liderleri körüşüvinde Ukrayina içün havfsızlıq kefaletlerinen plan azırlanmalı, dep qayd etti o, martnıñ 27-nde Telegram kanalında.
Onıñ qayd etkenine köre, belli suallerniñ cevapları berilmeli: topraq, kök ve deñizdeki operatsiyalarda celp etilecek memleketler; küçlerniñ yerleri; qurulışı, sayısı ve telüke vaziyetinde cevap tertibi.
«Bizge tam bir plan kerek – epimiz razı olacaq ve yerine ketirecek planımız, endi siznen muzakere etilgen ve sizge açıq olğan variant ve qaralamalar esasında. Ukrayinağa bu plannı azırlamaq içün vekilleriñizni davet etmege isteymiz», – dep aytıla haberde.
Parijdeki körüşüv neticelerinden soñ Zelenskıy telükesizlik kefaletleri işi yaqın künleri ve aftaları devam etecek, dep bildirdi.
«Er kes añladı ve añlay, Rusiye bugün barışıq istemey. Bu pek müim, ve biz yaqın aftaları ve künleri telükesizlik kefaletleri üzerinde çalışacaqmız», – dep ayttı o, Büyük Britaiya baş naziri Kir Starmer ile brifingde.
Frenkistan prezidenti Emmanuel Makron ateş kesilgen soñ Ukrayina içün kefaletleri, hususan «istegenler koalitsiyasınıñ» quvetlerini yerleştirüvini muzakere etmek içün martnıñ 27-nde 27 memleketniñ liderini Parijde topladı.
Sammit arfesinde Makron şimdi Rusiye cenkini bitirmek içün «müim bir basamaq» olğanını, amma Moskva kerçekten barışıq istegenini köstermey, dep ayttı. Ukrayinağa qarşı darbeler devam ete ve endi tizilgen añlaşmalarğa yañı şartlar qoyula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
