Ukrayina prezidenti Volodımır Zelenskıynıñ bildirgenine köre, ömür arqadaşı ve diplomatik taqımınen beraber New Yorkqa BM Baş assambleyasınıñ 81-inci sessiyasına keldi.
"20-ge yaqın körüşüv planlaştırıldı, hususan: Amerika prezidenti, Avropa liderleri, ABD Kongressiniñ Vekiller palatasınıñ senatorları ve azaları, halqara teşkilâtlarnıñ vekilleri, büyük Amerika şirketleri ve talil merkezleriniñ reberlerinen. Yañı Drone Deal de imzalanmağa azır. Ebet, Ukrayinanıñ ilk vazifesi – barışıqnı yaqınlaştırmaq ve insanlarımıznıñ ayatını qorçalamaq. Cenk soñunı yaqınlaştıra bilgen telükesizlik ve kerginlikke qarşı qararlarda tekliflerimiz bar", – dep yazdı Zelenskıy Telegramda.
Prezidentniñ aytqanına köre, laf ava mudafaasınıñ quvetleştirilüvi ve "Ukrayina içün yeterli qadar maliye temin etilüvi" aqqında kete. Bundan ğayrı, New Yorkta memleketelerniñ yüksek seviyede "keniş temsil etilmesinen" "Qırım platformasınıñ" sammiti keçirilecek.
Haberge köre, Olena Zelenska Kolumbiya universitetiniñ student ve ocaları ögünde çıqışta bulunıp, BM meydançığında Birinci ledi ve centlmenler sammitiniñ neticelerini taqdim etecek. Birinci ledi Amerika iş adamları ve Olena Zelenska Fundatsiyası leyhalarına qoltutqan hayriye yapqan insanlarnen körüşecek, eki taraflı körüşüvler de olacaq – Büyük Britaniya baş naziriniñ ömür arqadaşı ve Dünya bankınıñ prezidentinen.
Zelenskıynıñ matbuat kâtibi bildirgenine köre, Trump ile körüşüvi Kyiv vaqtınen sentâbrniñ 22-nde aqşam ötkerilmeli.
Volodımır Zelenskıy Amerika lideri Donald Trumpnen New Yorkta BM Baş assambleyasında körüşecegini aytıp, "çoq şey deñişe bile, diplomatik dinamika bar", dep ayttı.
Bundan evel ABD prezidenti Donald Trump ve Ukrayina prezidenti Volodımır Zelenskıy iyulniñ 28-nde Beyaz Sarayda körüşken ediler.
Sentâbrniñ 6-nda Donald Trump veyekilleri Steve Witkoff ve Jared Kushner Kyivde Rusiyeniñ Ukrayinağa qarşı cenkini bitirüv körüşüvlerinde bulundılar.
Sentâbrniñ 6-nda Kyivdeki muzakerelerni Volodımır Zelenskıy ve Steve Witkoff "manalı" dep adlandırdı. Ukrayina prezidentiniñ aytqanına köre, taraflar Ukrayina içün telükesizlik kefaletleri ve iqtisadiy yardımnı, kerekli ava mudafaa vastalarınıñ berilüvini ve yañı qış mevsimi arfesinde yardım paketini muzakere ettiler.
Kyivdeki muzakerelerden soñ ABD prezidenti Donald Trumpnıñ kiyevi ve vekili Jared Kushner qışqa qadar cenk bitecek degen kefalet yoq, amma ABD bunıñ içün şaraitler üzerinde çalışa, dep bildirdi.
Bundan evel, sentâbrniñ 5-nde, Trumpnıñ vekilleri Moskvanı ziyaret etti. Amerika Cenkni tedqiq etüv institutı bildirgenine köre, Kreml Rusiyeniñ Ukrayinağa qarşı cenkni toqtatuvnen bağlı barışıq esnasında er angi ciddiy uzlaşuvğa razı olmağanını tekrarladı.