Ukraina prezidenti Volodımır Zelenskıy çarşenbe künü, dekabrniñ 29-nda, Milliy telükesizlik ve mudafaa şurasınıñ toplaşuvını ötkermege qarar berdi. Bu aqta MTMŞ saytı dekabrniñ 24-nde bildirdi.
«Ukraina Milliy telükesizlik ve mudafaa şurasınıñ kâtibi Oleksiy Danılovnıñ Ukraina prezidenti Volodımır Zelenskıyge yapqan maruzasından soñ devlet yolbaşçısı çarşenbe künü, 2021 senesi dekabrniñ 29-nda, Ukraina Milliy telükesizlik ve mudafaa şurasınıñ toplaşuvını ötkermege qarar berdi», – dep aytıla haberde.
Milliy telükesizlik ve mudafaa şurasınıñ saytı olacaq toplaşuvnıñ mevzuları aqqında haber etmey.
Toplaşuv Ukraina ve ğarbiy devletlerniñ arbiy istihbaratı bildirgen Ukraina sıñırlarındaki Rusiye ordularınıñ artması vaziyetinde keçirilecek. Ukraina ve çetel erbaplarına qarşı sanktsiyalar 2021 senesi devamında MTMŞ toplaşuvınıñ mevzuları oldı.
