Ukrayına prezidenti Volodımır Zelenskıy milliy azlıqlar qanunını imzaladı.
«Avropa integratsiyamız içün daa bir adım attıq», – dedi o. Bu qanunnıñ qabul etilüvi Avropa komissiyasınıñ Ukrayınadan Avropa Birligi namzeti olaraq talaplarından biri edi.
Qanun milliy azlıqlarğa tilini reklama, kütleviy haber vastaları ve yaşağan yerlerde diger saalarda qullanmağa imkân bere. Ükümet milliy azlıqlar içün mekteplerni olarnıñ tillerinde dersliklernen temin etmege mecbur. Bundan ğayrı, devlet milliy azlıqlarnıñ ananeleri ve medeniy mirasına qoltutuv ve saqlavını kefil ete.
Qanunda qayd etilgenine köre, Ukrayınada Rusiye ücümi sebebinden cenk vaziyeti ilân etilgeni içün – lâğu etilüvi ya da toqtatıluvından soñ yarım yıl içinde – rusiyelilerge bazı maddeler tesir etmeycek. Olarğa Ukrayınada barışıq toplaşuvlar keçirmege, mesleat organlarını qurmağa ve ükümetlerara komissiyalar erkânına kirmege yasaq etile. Bundan ğayrı, iç bir tedbirleri devlet tarafından maliye etilmeycek.
Milliy azlıqlarnıñ tillerinen bağlı qanun maddesi cenk vaziyeti lâğu etilgen ya da toqtatılğan soñ beş yıl devamında rus tili içün keçerli olmaycaq.
Noyabrniñ 8-nde Avropa komissiyası Ukrayınanıñ Avropa Birligi yolundaki muvafaqiyetlerine qıymet kesmeli. Namzet statusı oña 2022 senesi iyün ayında berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
