Rusiyeniñ ateşkes şartları aqqında memorandumınıñ variantınıñ berilüvini red etmesi Kremlniñ muzakerelerni «boş» yapmağa tırışqanını köstere, dep bildirdi Ukrayina prezidenti Volodımır Zelenskıy.
«Rusiye cenkni soza ve Moskvağa basqınen degil, söznen tesir etmege tırışqan memleketlerni aldatmaq içün elinden kelgenini yapa. Sözler Moskvağa tesir etmey. Vade etken ve bir aftadan ziyade azırlağan «memorandumlarını» bile kimse alâ daa körmedi. Ukrayinağa bermediler. Ortaqlarımızğa yollamadılar. Birinci körüşüvni qabul etken Türkiyege bile yañı kün tertibini yetkizmegenler. Amma tam tersini vade etken ediler, ve birinciden bunı ABDge, prezident Trumpqa vade etken ediler. Rusiyeniñ daa bir yalanı. Körüşüvler boş olsun dep elinden kelgenini yapalar», – dedi Zelenskıy mayısnıñ 29-nda aqşam muracaatında.
Onıñ aytqanına köre, bu «yeterli qadar sanktsiyalar – Rusiyege qarşı yeterli qadar basqı kerek olğan» daa bir sebep ola.
Bundan evel Ukrayina Tış işler naziri Andriy Sıbiğa da Rusiyeden Ukrayinağa ateşkes şartlarınen memorandum leyhasını yollamasını talap etti.
Bunı o, Rusiye Tış işler naziri Sergey Lavrov Rusiye tarafı Ukrayina ile barışıq añlaşmasına dair memorandum işini bitirdi ve Kyivge iyünniñ 2-nde İstanbulda muzakerelerniñ ekinci turı içün körüşmege teklif etken soñ ayttı.
Mudafaa naziri Rustem Umerov Ukrayinanıñ ateşkes vesiqası Rusiye tarafına berildi, dep bildirdi.
Kreml, Rusiyeni Ukrayinağa ateşkes tekliflerini bermege çağırğan Ukrayina Tış işler nazirliginiñ tekliflerini «konstruktiv olmağan» dep adlandırdı.
Kreml matbuat kâtibi Dmitriy Peskov Rusiyeniñ memorandum leyhasında teklif etecek ateşkes şartlarını aydınlatmağa razı olmayıp, «bütün muzakereler açıq degil, qapalı olmalı», dep bildirdi.
Mayısnıñ 16-nda İstanbulda Rusiye ve Ukrayina eyyetleri arasında muzakerelerniñ birinci turı keçti. Taraflar büyük ilerilevge irişemese de, faqat «1000-ge 1000» formatında cenk esirlerini deñişmege añlaştı. Deñişüvniñ soñki basamağı mayısnıñ 25-nde yekünlendi.
Eki taraf üç yıl içinde ilk sefer muzakere masası başına oturdı. Ukrayina ateşni 30 künge toqtatmağa talap etti. Lâkin Rusiye tarafı topraq isteklerinden öyle de vazgeçmedi – dört Ukrayina vilâyetinde öz suverenitetiniñ tanılmasını istey, Moskva bunı ateş toqtatıluvınıñ şartı olaraq bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
