Ukrayina Mustaqillik künü munasebetinen keçirilgen tedbirlerde Ukrayina prezidenti Volodımır Zelenskıy qırımtatar yırcısı Jamalağa III derece knâğınâ Olğa nişanını berdi. Bu aqta Prezidentniñ Qırım Muhtar Cumhuriyetindeki temsilciligi haber etti.
«Bu nişan – qadınlarğa cemaat faaliyetiniñ çeşit saalarında qazanğanları içün berilgen devlet mukâfatıdır. Qırımdan sanat erbaplarınıñ, hususan tamır halq vekilleriniñ devlet seviyesinde tanılması ukrayin cemiyeti içün pek müim ola», – dep aytıla haberde.
Jamalanıñ Instagramda yazğanına köre, bu mukâfat onıñ içün quvançlı ve beklenmegen oldı. Aynı vaqıtta, qayd etilgenler arasında vefat etken soñ mukâfat alğanlarnıñ bar olması kederlete, dep ayttı.
«Mustaqillik Kününde böyle yüksek mukâfat almağa pek memnün oldım ve beklemedim. Em quvanç, em keder bar, çünki qayd etilgenler arasında endi vefat etken soñ mukâfatlandırılğanlar bar. Kerçek şu ki, er künniñ yüksek qıymeti bar, er kün arta, er kün insanlarımız kete. Bu mustaqilligimizni saqlamağa imkân bergen imayecilerimizge minnetdar olmaq kerekmiz», – dep yazdı yırcı.
Avgustnıñ 24-nde Ukrayina mustaqilliginiñ 34-ünci yılını qayd ete. Bayram Ukrayina Sovet Sotsialistik Cumhuriyetiniñ Yuqarı Radasınıñ 1991 senesi avgustnıñ 24-nde Ukrayina mustaqillik qararını alğanı munasebetinen belgilendi – devletniñ yañı statusını pekitken siyasiy-uquqiy vesiqa. Bu status 1991 senesi dekabrniñ 1-nde umummilliy referendum tarafından tasdıqlandı, vatandaşlarnıñ 90,32%-ı mustaqillikke qoltuttı.