Ukrayina tarafı cenkni toqtatmaq içün dialognıñ çeşit formatlarına azır, amma «şart bar – ateş bütünley ve şartsız toqtatılmalı», dep bildirdi Ukrayina prezidentiniñ ofis yolbaşçısı Andriy Yermak.
Ukrayina prezidentiniñ ofis yolbaşçısı Telegramda bildirgenine köre, bunı o, Le Monde frenk neşirine ayttı ve prezident Volodımır Zelenskıy Rusiye lideri Vladimir Putin körüşmege razı olmasa bile, Türkiyege baracaq, dep qayd etti.
«Biz dialognıñ er angi formatına azırmız, amma şart bar – ateş tolusınen ve şartsız toqtatılmalı. Biz bundan qorqmaymız, çünki Ukrayina açıqlıq ve namuslılıq kösterdi. Şimdi söz Rusiyede. Ümüt etemiz ki, ABD, strategik ortağımız, esnastaki rolüni saqlar», – dep qayd etti Yermak.
Onıñ aytqanına köre, Putin muzakerelerden vazgeçse, «bütün dünyağa bir signal olacaq: Moskva barışıq olmasını istemey, ciddiy muzakerelerge azır degil».
Volodımır Zelenskıy Avropa mediasına, hususan Der Spiegel içün intervyü berip, mayısnıñ 15-nde İstanbulda Putinnen körüşse, «cenkni toqtatmaq içün format tapmağa» tırışacaq ola.
Zelenskıynıñ aytqanına köre, er şeyni birden çezmege imkânsız ola, lâkin körüşüvniñ «siyasiy ğalebenen» yekünlenmesi kerek – ateş toqtatılmalı ve esirler «episi episine» formatında deñişmeli.
Eki ğayeni soñki vaqıtları Ukrayina teklif ete. Rusiye tarafı ateşni toqtatmayıp, doğrundan muzakerelerge azır olğanını bildire. Kremlniñ haberine köre, Rusiye eyyeti Putin teklif etken İstanbuldaki muzakerelerde iştirak etmege niyetlene. Lâkin Rusiye prezidenti Türkiyege baracaqmı belli degil.
Bundan evel Yaqın Şarqta bulunğan ABD prezidenti Donald Trump, Rusiye ve Ukrayina liderleri anda körüşse, özü de İstanbulğa kele bile, dep bildirgen edi. Belli ki, ABD devlet kâtibi Marko Rubio, em de Trumpnıñ mahsus elçileri Stiv Uitkoff ve Kit Kellog İstanbulğa barmağa niyetleneler.
Ukrayinada Zelenskıynıñ Putin ile muzakereler olamaz degen buyruğı devam ete. Zelenskıy oña bu yasaq tesir etmey, dep añlattı.
Rusiyede ise Ukrayinadaki cenk sebebinden saylavlar belgilengen müddette keçirilmegeni içün Zelenskıy qanuniy prezident degil, dep bildirdiler. Lâkin soñki vaqıtları Moskva buña diqqat ayırmay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
