«İşğal etilgen topraqlarda, hususan Qırımda repressiyalarğa oğrağan er kesniñ ve esirlerniñ qaytuvı. Türkiyeniñ aracılığı pek müim, qırımtatarlar da, başqaları da – Rusiye apsinde tutulğan büyükler ve balalar, arbiy ve vatandaşlar azat etilmeli», – dep ayttı o, video muracaatında.
Zelenskıynıñ aytqanına köre, «barışıq formulasınıñ» işi, hususan yanvar ayında Davosta olacaq mesleatçılar seviyesindeki yañı körüşüv muzakere etildi. Ukrayına prezidenti Türkiye vekilini davet etti, dep ayttı – tasdıq cevabını aldı.
Zelenskıy Erdoğanğa, ve bütün Türkiyege Ukrayınadan deñiz ihrac ayatındaki iş yardımları içün teşekkürler bildirdi. Onıñ malümatına köre, bugünge qadar bu koridordan 14 million tonnadan ziyade yük taşındı – bu aman-aman beş yüz gemi.
Aynı vaqıtta Türkiye prezidentiniñ matbuat hızmeti bildirgenine köre, telefon subeti vaqtında Erdoğan Türkiyeniñ em Ukrayınada, em Filistinde qan tökülüvini toqtatmaq ve barışıq tiklemek içün ğayret köstergenini qayd etti.
«Erdoğan, Türkiye aracı olıp, Ukrayınada barışıq tiklenmesinen bağlı barışıq muzakerelerini qabul etmege azır, dep bildirdi. Erdoğan zahire koridorınıñ ğayrıdan tertiplenmesi ve ğayrıdan tiklenmesi müim ola dep qayd etip, bu meselede keçirgen diplomatik muzakerelerge diqqat celp etti ve ateş toqtatıluvı acele ilân etilmeli ve Ukrayınada barışıq yolu qurulmalı, dep qoştı», – dep aytıla Türkiye prezidentiniñ matbuat hızmeti haberinde.
Recep Tayyip Erdoğan Rusiyenen bağlarını qoruy. Rusiye prezidentinen bir qaç kere körüşken edi – soñki sefer bıltır sentâbr ayında.
Ankara esirlerni deñişüv, zahire añlaşmasınıñ işinen bağlı muzakerelerde iştirak etken edi.
Türkiye, 2022 senesi mart ayında Rusiyeniñ büyük istilâsı başlağan soñ Ukrayına ve Rusiye eyyetleriniñ muzakereleri içün meydançıq oldı. O vaqıt bu muzakereler barışıqnen yekünlenmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
