Ukrayina ve Türkiye prezidentleri Volodımır Zelenskıy ve Recep Tayyip Erdoğan New Yorktaki körüşüvde Qara deñizde telükesizlik meselesini, aşayt ihracatınıñ yañıdan başlatıluvını ve Drone Deal muzakere ettiler, dep bildirdi Ukrayina devlet yolbaşçısınıñ matbuat hızmeti.
Liderler deñiz ihracat koridorınıñ işi nasıl temin etilecegini muzakere ettiler.
"Bizim aşayt ihracatımızğa muhtac olğan memleketler er qıtada bar. Ve şimdi masada onı yañıdan başlatmaqnıñ çeşit variantları bar. Ukrayinanıñ cevap olaraq bergen uzun mesafeli darbelerini toqtatması içün Rusiye infrastrukturamızğa qarşı terror darbelerini toqtatmağa azır olmalı", – dedi Zelenskıy.
Berilgen malümatqa köre, o, Recep Tayyip Erdoğannı Amerika taqımınen bağları aqqında haberdar etti.
"Rusiyeniñ Ukrayinağa qarşı cenki böyle bitmeli, bu pek müim: halqara uquqqa lâyıq bir şekilde ve ürmet ile", – dep qayd etti Zelenskıy, Erdoğanğa Ukrayina topraq bütünligi ve suverenitetine qoltutqanı içün teşekkürler bildirip.
Prezidentler eki taraflı meselelerni de muzakere ettiler: serbest ticaret alanı ve ola bilecek dron añlaşması, dep bildirdi Prezidentniñ ofisi.
Erdoğannıñ körüşüvnen bağlı izaatları daa yoq.
Türkiye Tış işler naziri Hakan Fidan avgust ayında bildirgenine köre, Türkiye Rusiyege ve Ukrayinağa Qara deñizdeki ticaret gemilerine qarşı darbelerni yasaqlamağa teklif etti. Fidan Rusiye ve Ukrayina bu teklifni alğanlar, Ankara cevaplarını bekley, dep qayd etti.
Ukrayina mısır, boğday, raps, künaylan tuhumı ve ösümlik yağınıñ esas ihracatçısı ola, ihracatınıñ 90 fayızı Odesada ve etrafında Qara deñiz limanlarından keçe.
Yazda Rusiye ordusı Odesa vilâyetine, hususan liman infrastrukturasına qarşı ücümlerini quvetleştirdi, bu ise Ukrayina ihracatına mania ola. Rusiye arbiy infrastruktura, logistik obyekt ve çetel silâsını taşığan gemilerge qarşı darbe endire, dep bildire.