Bu afta «siyasiy ceetten müim olacaq», dep ayttı Ukrayına lideri Volodımır Zelenskıy.
«Daa bir yılğa kiremiz ve milliy maqsadlarımıznıñ añlavını saqlamaq kerekmiz. Toprağımıznı duşmandan qurtaruv ve Ukrayınanıñ ğayrıdan tiklenmesi, insanlarımıznıñ evge qaytması, devletimizniñ esas ortaqlarnen yaqınlaşması, dünyada Ukrayına içün yañı imkânlarnıñ açılması – eñ yaqın vaqıtnıñ vazifesidir. Tek devlet içün degil, er birimiz içün», – dep qayd etti o.
Siyasetçi eñ yaqın vaqıtta Yuqarı Radağa Ukrayınanıñ iç ve tış vaziyetinen bağlı er yıllıq muracaatında bu vazifelerni yerine ketirüvnen bağlı fikirlerini aydınlatmağa söz bere.
Zelenskıy, bank sistemasınıñ işi ve Dünya para fondu ile işbirliginen bağlı toplaşuv keçirilüvi, İtaliya baş naziri ve dünyanıñ eñ büyük yatırım fondu BlackRock reberi ile subeti aqqında bildirdi.
«İnkişaf etken dünyanıñ biznesi ğalebemizge işana ve ğayrıdan tiklenmemiz içün yatırım yapmağa azır olğanını daa bir kere eşittim. Bu şirketniñ mütehassısları Ukrayınağa devletimizni ğayrıdan tiklev fondunı tertipleştirmege yardım ete. Davostaki Dünya iqtisadiyat forumında iştirak etmege azırlanamız. Ukrayınanıñ fikir ve istiqbali anda taqdim etilecek», – dep qoştı o.
Daa evel Ukrayına prezidenti Volodımır Zelenskıy memleketniñ vatandaşlarını Rusiye ordusı yılnıñ soñki künlerini qara ve ukrayınalılar içün qıyın yapmağa tırışa, dep tenbiledi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
