Ukraina prezidenti Volodımır Zelenskıy fevralniñ 16-nı Birlik künü olaraq ilân etti. Bu buyruq endi imzalandı, dep haber ete Ukraina devlet yolbaşçısınıñ saytı.
«Bu künü milliy bayraqlarnı asaraq, sarı-mavı şeritler taqıp, birligimizni bütün dünyağa kösterecekmiz», – dep aytı Zelenskıy.
Bazı kütleviy haber vastaları, hususan Spiegel alman neşiri, fevralniñ 16-nı Rusiyeniñ Ukrainağa ücüm etecek künü dep aytqan edi.
«Qarşı qoyacaq küçümiz bar, ordumız yahşı, askerlerimizniñ unikal cenk tecribesi ve zemaneviy silâsı bar, bu ordu sekiz yıl evelsi olğanından qat-qat küçlüdir», – dep ayttı Zelenskıy. O, Donbas ve Qırım Ukrainağa yalıñız diplomatik yolnen qaytacaqlar, dep qoştı.
ABD ve bir sıra diger memleketniñ resmiy vekilleri bu afta Rusiyeniñ Ukrainağa ücüm etüv ihtimalı büyük, dep bildirgen edi. Aynı vaqıtta qayd etilgenine köre, Rusiye ücüm etmege cesaret etermi alâ daa belli degil. Ğarp memleketleriniñ liderleri diplomatiya yolu ola bile, dep ayta.
Rusiye ücüm planlarını inkâr ete. Rusiye Mudafaa naziri Sergey Şoygu bazarertesi künü prezident Vladimir Putinnen körüşip, şimdi büyük talimler keçirile, amma çoqusı tezden yekünlenecek, dep ayttı.
