Ukraina prezidenti Volodımır Zelenskıy Amerika lideri Joe Biden ile ne aqta laf etecegini aydınlattı. Bu aqta o, «1+1» telekanalında «Natalya Moseyçuk ile VIP» yayınında ayttı. Muzakere etilecek meseleler arasında Qırım ve Qara ve Azaq deñizlerindeki telükesizlik bar.
«Muzakere etilecek bir qaç blokumız bar. Hususan telükesizlik bloku. Bu tek NATO azalığı areketleri planı degil, memleketlerimiz arasında mudafaa memorandummı meseleleri de. «Şimaliy aqım-2» meselesi – eminim, telükesizlik meselesi, men bunı birleştirem. Donbas meselesi. Qırım meselesi ve Qara ve Azaq deñizlerindeki telükesizlik. Ukraina flotunıñ meselesi», – dedi Zelenskıy.
O, Ukraina içün arbiy yardım arttırıluvı ve iqtisadiy meselelerni muzakere etmege istey.
«Dünya para fondunıñ destegi bizim içün pek müim. Amma men lafnı siyasetten iqtisadiyatqa ve islâatlarğa keçirmege isteyim. Belli işaretler bar, ve bu aqta añlaştıq, yani dünya para fondunen ortaqmız», – dep qayd etti Zelenskıy.
Ukraina Tış işler naziri Dmıtro Kuleba bildirgenine köre, ABD ve Ukraina prezidentleri iyülniñ soñunda ABDde olacaq.
Biden ve Zelenskıy iyünniñ 7-nde telefonda laf etti.
Beyaz saray haberine köre, Biden Putin ile sammitten soñ Zelenskıynen körüşmege planlaştıra, dep bildirdi.
