Yaqın kelecekte Ukrayina öz Avropa ortaqlarınen beraber «irişmemiz kerek olğan sızıqlar ve çekilmege mümkün olmağan sızıqlar» olacaq barışıq planını tizecek. Bular ABDdeki ortaqlarğa taqdim etilecek, dep bildirdi Ukrayina prezidenti Volodımır Zelenskıy martnıñ 3-nde Londradaki sammitten soñ gece video muracaatında.
«Barışıq içün diplomatiya olacaq. Ve epimiz beraber olayıq dep – Ukrayina, bütün Avropa ve, elbette, elbette, Amerika. Ebet, biz Amerikanıñ emiyetini añlaymız ve Amerika Birleşken Devletlerinden alğan bütün yardım içün minnetdarmız. Bu minnetdarlıqnı duymağan künümiz olmadı. Çünki bu mustaqilligimizni saqlap qalğanımız içün minnetdarlıqtır: Ukrayinadaki istiqrarımız ortaqlarımıznıñ bizim içün ve öz telükesizligi içün yapqanlarına esaslana», – dedi Ukrayina prezidenti.
Zelenskıynıñ qayd etkenine köre, Ukrayinağa «toqtamağan cenk degil, barışıq kerek». Onıñ aytqanına köre, telükesizlik kefaletleri bunıñ anahtarı ola.
«İşançlılıq, barışıqnıñ devamlılığı, cenkni bitirmek içün doğru añlaşma – bu, kerçekten de, bizim umumiy ilk vazifemizdir», – dep tüşüne Ukrayina prezidenti.
Büyük Britaniyadaki sammitten ve dünya liderlerinen körüşüvlerden soñ Ukrayina prezidenti emin ki, «bu künlerniñ neticesi Avropadan açıq destektir. Daa çoq birlik, daa çoq işbirligi istegi».
«Er kes aynı fikirde: barışıq aqiqiy olsun dep, aqiqiy havfsızlıq kefaletleri kerek. Ve bu bütün Avropamıznıñ fikri – bütün qıtamıznıñ. Britaniya, Avropa Birligi, Norvegiya, Türkiye. Bugün biz pozitsiyalarımıznı koordinatsiya ettik. Çoq körüşüv olacaq. Yaqın künlerde ve aftalarda çoq ortaq iş olacaq», – dep qayd etti o.
Martnıñ 2-nde Londrada Ukrayinağa bağışlanğan sammit olıp keçti. Ukrayina prezidenti ofisiniñ malümatına köre, 18 devlet ve ükümet başı ve halqara institutlarnıñ reberleri iştirak ettiler.
Liderler Ukrayina mudafaa sanayısına maddiy yardımnıñ devamı, şu cümleden iç silâ istisalına yatırımlar, em de Avropa mudafaa sanayısına para berüvniñ arttırılmasını muzakere ettiler.
Bundan ğayrı, barışıqnıñ temeli küçlü telükesizlik kefaletleri olmalı degen qarar bar. Şimaliy atlantik añlaşması mehanizmlerini telükesizlik kefaleti ve Ukrayina ordusınıñ quvetleştirilüvi olaraq celp etüv imkânı baqıla, dep bildirdi Prezidentniñ ofisi.
Büyük Britaniya baş naziri Keir Starmer bildirgenine köre, Büyük Britaniya Frenkistan ve Ukrayinanen beraber «cenk uruşlarını toqtatuv» planını azırlamağa añlaşqanlar, soñra onı ABDge taqdim etecekler.
Sammit fevralniñ 28-nde Ukrayina prezidenti Volodımır Zelenskıy ABD prezidenti Donald Trump ve vitse-prezident James David Vance ile Rusiyeniñ Ukrayinağa qarşı cenki aqqında Beyaz Sarayda tartışqan soñ oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
