Ukrayina prezidenti Volodımır Zelenskıy dekabrniñ 23-nde jurnalistlernen laf etip, soñki aftaları ABD, Ukrayina ve Avropa vekilleri çalışqan barışıq añlaşmasınıñ leyhasını taqdim etti.
ABD ve Ukraiyna cenkni bitirüvnen bağlı 20 maddelik temel vesiqanı azırladılar.
Plannıñ esas maddelerinden biri Rusiye ve Ukrayina arasında ücüm olmaycağına dair tolu ve şartsız añlaşma oldı. "Uzun müddetli barışıqnı temin etmek içün kosmik uydu monitoringi yardımınen çatışma yerini kontrol etmek, bozuvlar aqqında erte bildirüv içün mehanizm qurulacaq", – dep tarif etti Ukrayina prezidenti.
Leyhağa köre, Ukraiyna Silâlı quvetleriniñ sayısı barışıq vaqtında 800 biñ seviyesinde qalacaq.
ABD, NATO ve Avropa devletleri NATO añlaşmasınıñ 5-inci maddesine teñ kelgen Ukrayinağa telükesizlik kefaletlerini berecek, dep tahmin etile.
Maddelerden birinde Rusiye Avropa ve Ukrayinağa ücüm etmeme siyasetini bütün qanunlarında ve tasdıq vesiqalarında qayd etecek, dep aytıla.
Plannıñ daa bir maddesinde Ukrayina belli bir vaqıtta AB azası olacaq ve Avropa bazarına qısqa müddetli imtiyazlı kirişni alacaq, dep aytıla.
Leyhada bu añlaşmanıñ işke tüşürilmesi içün Rusiye Dnipropetrovsk, Mıkolayıv, Sumı, Harkiv vilâyetlerinden ordusını çeke, dep aytıla.
Ukrayina añlaşma tizilgen soñ mümkün olğanı qadar tez saylavlar keçirmeli.
Zaporijjâ atom elektrostantsiyası meselesinde şimdilik bir uzlaşuv yoq.
Soñki aftaları ABD Moskva ve Kyiv arasında barışıq añlaşmasınıñ tizilmesini istey. Miami muzakerelerinden soñ Zelenskıy bir qaç vesiqanıñ draftı azır, dep bildirdi – hususan Ukrayina içün telükesizlik kefaletleri, bu cenkni bitirmek içün ğayrıdan tiklev ve esas çerçivenen bağlı.
Miamide Amerika taqımınen Rusiye vekilleri de körüşti. Kreml bu muzakerelerni ilerilev olaraq qabul etmege kerekmey, dep bildirdi.
