Amerika Birleşken Devletleri Ukrayinanı telükesizlik kefaletlerini almaq içün Donbastan ordusını çıqarmasına mecbur etecek bir şart qoydı. Bu aqta Ukrayina prezidenti Volodımır Zelenskıy Reuters agentligine bergen intervyüsında ayttı.
Onıñ bildirgenine köre, ordunıñ çıqarılması em Ukrayina, em Avropanıñ havfsızlığını telükege oğratacaq, çünki regionnıñ yahşı pekitilgen mudafaa mevzileri Rusiyege qalacaq.
Ukrayina prezidenti qayd etkenine köre, ABD şimdi İran ile zıddiyetke diqqat ayıra.
"Yaqın Şarq, şübhesiz, prezident Trumpqa, ve mence, nevbetteki adımlarına tesir ete. Ne yazıq ki, menim fikirimce, prezident Trump Ukrayina tarafına basqı quvetleştirüv strategiyasını saylay", – dedi Zelenskıy.
Yanvar ayında Ukrayina prezidenti Kyivniñ topraq meselesinde fikri deñişmedi, uzlaşuvlar ise eki taraflı olmalı, dep ayqan edi. O, ABD ile eki taraflı telükesizlik kefaletleri "100%" azır, ve Kyiv olarnıñ imzalanmasını bekley, dep qoştı.
ABD böyle bir şart qoya bilecegini Financial Times menbalarına esaslanıp yazğan edi. Neşir subetdeşleriniñ aytqanına köre, Ukrayina ordusı çıqarılsa, Washington barışıq vaqtında Ukrayina Silâlı quvetleri içün silâ berilüvini arttırmağa azır. Aynı vaqıtta, ABD formal bir mecburiyet alacaqmı belli degil edi.