Ukrayina prezidenti Volodımır Zelenskıynıñ yañı qanun leyhasında istilâcı devletniñ pasportını alğan ukrayinlerni vatandaşlıqtan marum etmek teklifi işğal etilgen topraqlarnıñ sakinleriniñ kerçeklerini köz ögüne almay. Bu fikirni ZMINA insan aqları merkeziniñ talilcisi Onisiya Sinük bildirdi.
Onıñ aytqanına köre, qanun leyhası, işğal etilgen topraqlarda yaşağan insanlar içün vatandaşlıqnıñ göñülli aluvını nasıl belgileycegini aydınlatmay.
O şunı da qayd ete ki, qanun leyhası vatandaşlıqnı ğayıp etüv sebebi olaraq Ukrayinağa qarşı silâlı tecavuzda iştirak etüv ve muqavele imzalavını teklif ete. Belli olğanı kibi, Rusiye işğal etilgen topraqlarda, şu cümleden Qırımda, ukryainlerni mecburen seferber ete.
''Teklif etilgen norma işğal etilgen topraqlardaki kerçekni, hususan Rusiye Federatsiyasınıñ zorlav ve şarait yaratqan müitini, bu topraqlarda Rusiye pasportı olmağan insanlarnıñ iş, içtimaiy hızmet, tasil, tibbiy hızmet ve ilâhre sıñırlanğanını köz ögüne almay. Böyle şaraitte RF vatandaşlığını almağa qararğa göñülli olaraq baqmaq mümkün degil'', - dep qayd ete ekspert.
Yanvarniñ 22-nde Ukrayina prezidenti Volodımır Zelenskıy Yuqarı Radağa 10425-nci qanun leyhasını baqıluvğa berdi.
Qanun leyhası vatandaşlıqnı coymaq içün yañı sebeplerni belgiley. Ukrayina vatandaşı tarafından Ukrayina Yuqarı Radası tarafından istilâcı ya da işğalci devlet olaraq tanılğan devletniñ vatandaşlığını alması Ukrayina vatandaşlığını coymaq içün bir sebep ola bile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
