Ukraina akimiyeti tutulğan şahıslarnı almaştırmaq içün azırlıq köre, dep ayttı Ukraina prezidentiniñ yardımcısı Andriy Yermak LB.ua neşirine, dep haber ete Azatlıq Radiosı.
Jurnalistniñ hatırlatqanına köre, Ukraina Yuqarı Radasınıñ insan aqları vekâletlisi Lüdmila Denisovanıñ malümatına esaslansa, Rusiye ve işğal etilgen Qırımda 113 Ukraina vatandaşı apiste tutula. O, Ukraina akimiyeti kontrol etmegen Donetsk ve Lugansk vilâyetleriniñ rayonları boyunca böyle cedveller barmı, dep soradı.
«Ebet. İş yapıla. Raqamlarnı aytıp olamayım, yüzlernen insan. Bir aydan soñ raqamlarnı bilecekmiz, dep tüşünem. Bu gruppanı azat etüv müddetlerini belgilev esnasına keçmek içün mimdi insanlarnıñ sayısını muzakere etemiz», – dedi Yermak.
Onıñ qayd etkenine köre, oktâbrniñ soñu tutulğanlarnı almaşuv içün kelişmeycektir.
«Lâkin nevbetteki deñişüv tez vaqıtta olsun dep elimizden kelgenini yapamız», – dedi Yermak.
Onıñ bildirgenine köre, Rusiyeniñ Ukrainadan kimni istegenini aytmaq qıyın.
«İstemeyim degil, soyadlarını bilmeyim. Bunı Ukraina telükesizlik hızmeti ve «Minsk» gruppası baqa. Neticede prezident qarar alacaq, amma kim qayda olğanını ve davalarınıñ statusını bilip, cedvellerni azırlamaq kerekmiz», – dep qayd etti prezidentniñ yardımcısı.
Ukraina telükesizlik hızmetiniñ malümatına köre, aydutlar Donbasta 227 ukrainalını tuta.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Sentâbrniñ 13-nde Ukraina prezidenti Volodımır Zelenskıy Kyiv yañı cedvellerni azırlay ve tutulğanlarnı deñişüvniñ yañı basamağı olacağını bekley, dep bildirdi. Kreml de yañı almaşuv olacağını inkâr etmey.
Vadim Pristayko, «yaqın vaqıtta» Rusiye ile tutulğanlarnı almaşuvnıñ yañı basamaq planları aqqında tarif etti.
