Ukraina Devlet sıñır hızmetiniñ yolbaşçısı Serğiy Deyneko ve Ukraina prezidentiniñ Qırım Muhtar Cumhuriyetiniñ daimiy vekili Anton Korınevıç Ukraina prezidenti Volodımır Zelenskıy isveç yırcısı Dr.Albannıñ Ukrainağa kirsetilüvine tesir etmedi, dep bildirdiler.
«Ukraina prezidentiniñ isveç yırcısı Dr.Albannıñ Ukraina ziyareti ve devlet sıñırından keçmesine alâqası yoq. Bu mesele Ukraina Devlet sıñır hızmetine aittir. Bunıñnen bağlı qoşma malümatnı bildirecekmiz», – dep yazdı Korınevıç.
Ukraina Devlet sıñır hızmetiniñ yolbaşçısı Serğiy Deynekonıñ malümatına köre, isveç yırcısı devlet sıñırından sıñırcılar yabancılarnı qayd etken qanunğa köre keçti.
«Sıñır kontroli meseleleri tek Ukraina Devlet sıñır hızmetine aittir. Sıñır qaravullarınıñ qararlarına kimse, şu cümleden Ukraina prezidenti de tesir etmey», – dep yazdı UDSH yolbaşçısı.
Deynekonıñ qayd etkenine köre, uquq qoruyıcı organları vazife berse, çetel vatandaşlarına sıñırdan keçmelerine izin berilmemesi mümkün.
«Amma bu yasaq olmasa ve kerekli vesiqalar olsa, (çetel vatandaşları – QA) Ukrainağa kirsetile bile», – dep aytıla haberde.
İşğalden soñ Qırımda çıqışta bulunğan isveç yırcısı Dr. Alban «Veçerniy kvartal» yañı yıl programmasında yırladı. Dr. Albannıñ çıqış videosı Facebookta «Kvartal 95» saifesinde derc etildi.
Çetel artistleri ve diger medeniyet erbapları Ukraina qapatqan keçiş noqtalarından Rusiye işğal etken Qırımğa çıqışta bulunmağa barıp, Ukraina qanunlarını boza. Qırımda gastrollerge kelgen ya da Rusiyeniñ Qırım ilhaqına qoltutqan bazı artist ve yırcılarğa esas Ukrainada çıqışta bulunmağa yasaq etildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
