Ukraina prezidentiniñ Qırım Muhtar Cumhuriyetindeki temsilciligi tezden işğal etilgen Qırımdan siyasiy mabüslerni qarşılaycaqlar, dep ümüt etkenini bildirdi. Müessise, Rusiye ve Qırımda mabüslerniñ azat etilüvinen bağlı yönelişni «eñ zor» iş dep adlandırdı. Bu aqta temsilcilikniñ Donetsk ve Lugansk vilâyetleriniñ işğal etilgen rayonlarından azat etilgen şahıslarnen bağlı beyanatında aytıla.
«Ne yazıq ki, bu etapta işğal etilgen Qırımda ve Rusiyede esirlikte bulunğan qırımlılar yoq. Bu vatandaşlarımız qanunsız taqip etilip, Rusiye tarafından siyasiy sebeplerden tutula», – dep aytıla haberde.
Qayd etilgenine köre, Ukraina vatandaşlarınıñ azat etilüvinen bağlı muzakereler eki yönelişte keçe – Donetsk ve Lugansk vilâyetleriniñ işğal etilgen rayonlarında tutulğan ve Rusiye ve Qırım apishanelerinde tutulğan şahıslarnıñ azat etilüvi.
«Bugün em Ukraina prezidenti, em muzakere gruppaları oğraşqan eki parallel yöneliş budır», – dep qayd etti temsilcilik.
Mında bu yönelişte muzakere esnası toqtamay, dep işandıralar.
«Ukraina işğalci memleket tarafından taqip etilgen er bir vatandaşımız – qırımtatarı, ukrain, diger millet vekili içün küreşe. Ümüt etemiz ki, tezden qırımlı esirlerni de azatlıqta qarşılaycaqmız», – dep aytıla haberde.
Cumaaqşamı künü, aprelniñ 16-nda, Donbasta daa bir deñişim kerçekleştirildi.
Ukraina Donetsk ve Lugansk vilâyetleriniñ ayrı rayonlarında tutulğan 20 vatandaşını azat etti, dep bildire Prezidentniñ ofisi. Azat etilgen ukrainalılarnıñ cedveli derc etildi.
Ukraina ve «LDNR» gruppirovkaları arasında tutulğanlarnı soñki deñişim 2019 senesi dekabrniñ 29-nda oldı. Donetsk ve Lugansk vilâyetleriniñ işğal altındaki rayonlarından 81 ukrainalı azat etildi: 76-sı Ukraina ükümetiniñ kontroli altındaki topraqqa qayttı, daa beşi Rusiye gibrid quvetleri kontrol etken yerlerde qalmağa istedi. 76-dan 12-si endi sabıq cenk esirleri ola, 64-ü – vatandaştır. Ekinci tarafqa 124 insan teslim etildi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
