Ukraina prezidentiniñ Qırım Muhtar Cumhuriyetindeki temsilciligi, koronavirus tarqaluvı sebebinden Qırım ve Herson vilâyetiniñ memuriy sıñırında kirsetilgen sıñırlavlardan soñ Rusiye işğal etken Qırımğa kirip olamağan vatandaşlarğa yardım etecegini vade ete.
«Vatandaşlar temsilcilikke muracaat etip, memuriy sıñırdaki keçiş noqtasından vaqtınca işğal etilgen Qırımğa kirip olamağanını şikâyet ete. Vaziyetni taqir etip, yardım etmege tırışacaqmız», – dep aytıla temsilcilikniñ Facebook haberinde.
Ukraina baş nazir muavini Aleksey Reznikov, Kyiv kontrolindeki topraqlarda qaydı olmağan işğal etilgen Qırım ve Donetsk ve Lugansk vilâyetleri rayonlarınıñ sakinlerini esas Ukrainağa kirsetmemek qararı doğru olğanını saya. O, vatandaş içün istisna yapıp, keçire bileler, dep qayd etti. Ukraina aq qorçalayıcıları, qırımlılarnı ve Donetsk ve Lugansk vilâyetleriniñ işğal etilgen rayonlarınıñ sakinlerini kirsetmemek qararını takbih etti.
Ukraina Nazirler şurasınıñ martnıñ 17-nde bildirgenine köre, Qırım ve Herson vilâyetiniñ memuriy sıñırındaki kontrol noqtalarından keçiş aprelniñ 3-ne qadar sıñırlandı. Ukraina Devlet sıñır hızmeti, esas Ukrainada qaydı olmağan vatandaşlar kirsetilmeycek, dep añlattı.
Rusiye FSBsi martnıñ 18-nde saat 00-dan başlap esas Ukrainadan Qırımğa «çetel vatandaşlarını» kirsetmeycek.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
