Ukraina Prezidentiniñ Qırım MC-deki damiy temsilcisi Anton Körineviç ve Qırım MC ve Aqyar şeeri sakinleriniñ aqlarına riayet olunması boyunca vekâletlisiniñ temsilcisi İrina Verigina işğal etilgen Qırım ve Ukraina esas qısmı arasındaki sıñırda "Kalançak" kiriş-çıqış yoqlav keçitini ziyaret ettiler. Bunıñ aqqında Qırım.Aqiqatqa Ukraina Devlet sıñır hızmeti haber etti.
"Herson sıñır müfrezesiniñ başı polkovnik Konstantin Barbaşovnıñ refaqatında musafirler sıñırdaki kiriş-çıqış operatsiyalarnıñ tertibi, sıñırcılarnıñ hızmetinen ve yoqlav keçitteki infraterkip ile tanıştılar", - dep yazıla bildirmede.
Sıñırcılarnıñ malümatına köre, şimdiki vaqıtta "Kalançak" yoqlav keçitinde rentgen-televizionn introskoplarnıñ qoyulması ve sazlaması ile bağlı işler devam etmekte.
"Böyle chazlar artıq "Çonğar" kiriş-çıqış yoqlav keçitinde çalışa ve müsbet neticeler köstere", - dedi Barbaşov.
Körüşüvniñ soñunda "Kalançak" hızmet mıntaqasında Ukraina Birlik künü munasebeti ile tantanalı şekilde Ukraina devlet bayrağını köterdiler.
