Ukraina prezidentiniñ Qırım Muhtar Cumhuriyetindeki daimiy vekili Anton Korınevıç Rusiye işğal etken Qırım yarımada işğalden qurtarılğanına qadar esas Ukrainadan suv almaycaq, dep daa bir kere qayd etti.
Bu aqta o, oktâbrniñ 10-nda Qırım.Aqiqat Radiosınıñ yayınında ayttı.
«Suv ve Qırımnen bağlı er şey aynı qala. Yarımada işğalden qurtarılğanına qadar bunıñ lafı bile olmaz», – dep ayttı Korınevıç.
Onıñ aytqanına köre, Qırım suv berüv meselesi Herson akimiyetinen muzakere etilgen edi.
«Yaqında bu meseleni Herson vilâyeti memuriyetiniñ yolbaşçısı Yuriy Gusevnen laf etip, fikrimizni tasdıqladıq. Kanalnıñ tek Herson vilâyetindeki qısmı, tek Herson vilâyetini suvarmaq içün qullanıla bile. Bu qadar. Qırımğa suv bermeymiz, bir şey deñişmedi ve deñişemez», – dep qoştı o.
Daa evel Qırımnıñ Rusiye ükümetindeki Devlet suv hocalığı komitetiniñ yolbaşçısı Aleksey Lisovskiy Şimaliy-Qırım kanalı Dnipro suvını almağa azır, dep bildirdi.
Ukraina akimiyeti işğal etilgen Qırımnıñ suvnen teminlevi tek yarımada işğalden qurtarılğan soñ yañıdan tiklenecek, dep bir qaç kere qayd etken edi.
Ukraina Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminley edi. 2014 senesi Rusiye Qırımnı işğal etken soñ, yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
