Ukraina prezidentiniñ Qırım Muhtar Cumhuriyetindeki temsilciliginiñ ekspertler şurasına eki qırımlı qoşuldı – «Qırım eviniñ» programma müdiri Alim Aliyev ve «Qırım strategik tedqiqatlar institutı» cemaat teşkilâtınıñ leyha koordinatorı, Bağçasaray tarihiy-medeniy qoruğınıñ sabıq müdiri Elmira Ablâlimova, dep bildire temsilcilikniñ matbuat hızmeti Facebookta.
«İnformatsion, medeniy ve tasil saalarında rolümni körem. Mütehassıs olğan saalarımda. Temsilcilikniñ ekspertligini quvetleştirmek içün. Çeşit akimiyet organlarına sıq-sıq mesleat berip, yapılacaq ve yapılmaycaqlarnı ayta bilemiz. Amma bu iş neticeleri bizge bağlı», – dep izaatladı tayinlevini Alim Aliyev Qırım.Aqiqatqa.
2019 senesi noyabr ayında Ukraina prezidenti Volodımır Zelenskıy prezidentniñ Qırım Muhtar Cumhuriyetindeki daimiy vekiliniñ birinci muavini vazifesine Darya Sviridovanı ve muavini olaraq «KrımSOS» aq qorçalayıcı teşkilâtınıñ koordinatorı Tamila Taşevanı tayin etti.
Keçken sene avgust ayında Ukraina gumanitar siyasetini azırlağan ofis koordinatorı olaraq qırımlı, «Vostok SOS» hayriye teşkilâtınıñ icra müdiri Aleksandra Dvoretskaya tayin etildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
