Ukraina prezidenti Volodımır Zelenskıynıñ ofisi «yahşı niyetniñ ilk adımı» olaraq Kyivde apiste tutulğan «RİA Novosti-Ukraina» yolbaşçısı Kirill Vışinskiyni ve Rusiyede mahküm etilgen ukrainalı rejissör Oleg Sentsovnı aynı vaqıtta azat etmege teklif ete.
Bu aqta Zelenskıynıñ matbuat kâtibi Yuliya Mendel Facebook saifesinde yazdı.
«Prezidentniñ ofisi Ukraina tarafından eyi niyetniñ ilk adımı olaraq Rusiye Federatsiyasınıñ Kirill Vışinskiyniñ azat etilüvi teklifine büyük meraqnen yanaştı. Eyi niyet adımlarınıñ siyasetine tolusınen qoltutıp, Rusiyege de adım atmağa – Oleg Sentsovnı azat etmege teklif etemiz. Yahşı niyetlerimizden emin olmaq içün bunı aynı vaqıtta yapmağa teklif etemiz», – dep yazdı Mendel.
Rusiye prezidentiniñ matbuat kâtibi Dmitriy Peskov Ukrainada devlet hainliginde qabaatlanğan Kirill Vışinskiyniñ azat etilüvini «Rusiye-Ukraina munasebetleriniñ eyileştirilmesine doğru güzel bir adım» olaraq adlandırdı.
«RİA Novosti-Ukraina» baş muarriri Kirill Vışinskiy 2018 senesi mayısnıñ 15-nde Kyivde devlet hainliginden (Ceza kodeksiniñ 111-inci maddesi) şübheli sayılıp tutulğan edi. Eki künden soñ apiske alındı ve bugünge qadar SİZOda buluna.
Vışinskiy anayasa qurumını devirmege tırışqanında (Ceza kodeksiniñ 109-ıncı maddesi), separatizmde (Ceza kodeksiniñ 110-uncı maddesi), milliy duşmanlıq doğurğanında (Ceza kodeksiniñ 161-inci maddesiniñ 1-inci qısmı) ve silânı qanunsız saqlağanında (Ceza kodeksiniñ 263-ünci maddesiniñ 1-inci qısmı) qabaatlana. Vışinskiy «RİA Novosti-Ukraina» reberi olıp, «Rusiyeniñ Ukrainağa qarşı yıquv faaliyetine yardım etkeninde» qabaatlana.
Vışinskiy bütün qabaatlavlarnı inkâr etip, özüne qarşı davanı siyasiy sebeplernen bağlay. Apiske alınğan soñ Vışinskiy Ukraina vatandaşlığından vazgeçti ve Rusiye prezidenti Vladimir Putinden yardım istedi. Rusiye Tış işler nazirligi Ukrainadan Vışinskiyni azat etmesini defalarca talap etip, onıñ taqip etilüvini siyasiy sebeplernen bağlay edi.
Qırımlı rejissör Oleg Sentsov ve anarhist Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
Oleg Sentsov Rusiye şimalindeki Labıtnangi şeerinde apiste yata. Aleksandar Kolçenko ise Uraldaki Kopeysk şeeriniñ koloniyasında buluna.
Keçken sene Rusiye apishanelerinde tutulğan bütün ukrainalı siyasiy mabüslerni azat etmek talabı ile tutqan 145 künlik açlıqtan soñ Oleg Sentsov «aşamağa yazma şekilde razı oldı». O, bunı «zornen aşatuv telükesi bar olğanından mecburiy adım» dep adlandırdı. Amnesty International zornen aşatuv işkence ola, dep bildirdi. 2018 senesi oktâbrniñ 25-nde Sentsovğa Avropa parlamentiniñ «İfade serbestligi» içün Saharov mukâfatı berildi.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
