Ukraina prezidenti namzeti Volodımır Zelenskıynıñ ömür arqadaşı Yelena Zelenskaya «qanunsız silâlı birleşmeler aydutlarınıñ mühbiri» olaraq «Mırotvorets» saytınıñ bazasına kirsetildi.
«Mırotvorets» saytınıñ haber etkenine köre, Zelenskaya 2014 senesi aprelniñ 15-nde «Yelena Zelenskaya» olaraq adlandırılğan Facebook saifesinde Rusiye propaganda kütleviy haber vastalarınıñ malümatı paylaşılğanı içün «Çistilişçe» cedveline oğradı: «http://lifenews.ru/app/desktop üzerinden Ukraina ordularınıñ areketlerini haber etiñiz. 15 000 ruble bahşış #Ukraina».
«Mırotvoretsniñ» bildirgenine köre, daa soñra bu yazı Facebook saifesinden silindi.
«Mırotvorets» merkezi uquq qoruyıcı organlarını bu yazını bu vatandaşnıñ Ukraina milliy telükesizligi, barışıq, insan havfsızlığı ve halqara nizamğa qarşı areketleri olaraq tanımasına çağıra», – dep aytıla Yelena Zelenskayanıñ «Mırotvorets» saytındaki malümatında.
Zelenskaya «Mırotvoretsniñ» qabaatlarını daa izaatlamadı. «Mırotvorets» saytı qayd etken saife Facebook tarafından resmiy şekilde tasdıqlanmağan edi.
«Mırotvorets» merkezi cemaat teşkilâtı olıp, Donbas ve Qırım separatistleri ve olarğa qoltutqan çetel vatandaşları aqqında malümat toplay.
Bu şahıslarnen bağlı malümatnı «Mırotvorets» saytındaki «Çistilişçe» bölüginde derc ete.
