Ukrayina prezidenti Volodımır Zelenskıy Valeriy Zalujnıyğa Ukrayina Qaramanı unvanını berdi. Bir kün evelsi ise Ukrayina silâlı quvetleriniñ baş komandanı vazifesinden boşatqan edi.
Ukrayina prezidentiniñ saytında derc etilgen fermanda aytıla ki, ''Altın Yıldız'' ordeni ile Ukrayina Qaramanı unvanını General Valeriy Fedoroviçke berilsin.
Fevralniñ 8-nde Ukrayina prezidenti Volodımır Zelenskıy ve Ukrayina Silâlı quvetleriniñ baş komandanı Valeriy Zalujnıy körüşüv keçirdiler, onıñ neticesinde ekisi de Ukrayina Silâlı quvetlerinde deñişmelerniñ keregi aqqında bildirdiler.
Bundan soñ Volodımır Zelenskıy, devlet yolbaşçısı "eki yıl qorçalağanı içün" teşekkür bildirgen Valeriy Zalujnıynıñ yerine Ukrayina Silâlı quvetleriniñ yañı baş komandanı olaraq general-polkovnik Oleksandr Sırskıynı tayinledi.
Zelenskıy, general Zalujnıyğa "Ukrayina devletiniñ komandasında beraber olmağa" teklif etkenini bildirdi.
58 yaşındaki general-polkovnikOleksandr Sırskıy 2019 senesi avgust ayından yañı vazifesine qadar Ukrayina Silâlı quvetleriniñ Qara quvetlerine yolbaşçılıq ete edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
