Ukraina prezidenti Volodımır Zelenskıy, Yuqarı Radanı dağıtıp yiberecegi aqqında billdirdi, dep haber ete Azatlıq Radiosı.
“Men Yuqarı Radanıñ 8-inci çağırışını dağıtam. Ukrainağa şüret!”,-dedi o.
Bundan evel Zelenskıy, Saylav kodeksi ve başqa qanunlarnı qabul etmek içün, Mudafaa nazirliginiñ, Ukraina Havfsızlıq hızmetiniñ ve Ukraina Baş prokuraturasınıñ başlıqlarını işten çıqarmaq içün Yuqarı Radağa eki ay berdi.
Mayıs 17-sinde Ukraina Yuqarı Radası spikeri Andriy Parubiy, “Yevropeyskaya Ukraina” mebus fraktsiyalarnıñ koalitsiyasınıñ faaliyeti toqtatılğanı aqqında bildirdi.
Ukraina qanunlarına köre, fraktsiyalar koalitsiyasınıñ faaliyeti toqtatılğanı aqqında ilân etilgeninden soñ, olar 30 kün devamında yañı koalitsiya aqqında añlaşa bile. Bu yapılmasa, prezident parlamentni dağıtıp, müddetten evel saylavlarnı tayin ete bile. Amma Yuqarı Radanıñ ameli bitkenine yarım yıldan az qalsa, böyle yapmağa imkân yoq.
Nevbetteki parlament saylavları 2019 senesi oktâbr 27-sine tayinlendi.
