Ukraina prezidenti Volodımır Zelenskıy, Ukraina akimiyeti idraqlı diplomatiya yardımınen ğayıp etilgen topraqlar üzerinde nezaretni qaytarmağa istegenini ifade etti.
Bunı o, sentâbr 13-ünde 16-ncı "Yalta Avropa strategiyası" forumında ayttı.
Bundan ğayrı prezident, Rusiyege qarşı sanktsiyalarnı toqtatmamağa Ğarpqa muracaat etti.
"Biz, cenkni toqtatıp, öz topraqlarımıznı qaytarmaq kerekmiz. Bizim silâmız – bu sanktsiyalar. Ğarbiy ortaqlarımızğa ürmetim pek büyük, amma kimerde olar sanktsiyalarnıñ toqtatılması aqqında tüşüne. Ciddiysizmi? Siz aqça coyasıñız, biz ise adamlarnı. Sanktsiyalar qalmaq kerek", – dedi o.
Kyivde sentâbr 12-sinde 16-ncı "Yalta Avropa strategiyası" forumı açıldı, anda sentâbr 13-ünde Ukraina prezidenti Volodımır Zelenskıy da keldi.
Bu yıl forumnıñ adı – "Baht şimdi. Burhanda dünyanıñ yañı yanaşmaları" edi. Teşkilciler, konferentsiyada 26 memleketten 400-den ziyade belli siyasetçi, diplomat, iş adamı, cemaat faali ve ekspert iştirak etkenini haber ete.
Tedbir sentâbr 14-üne qadar keçirilecek.
"Yalta Avropa strategiyası" (YAS) – Ukrainanıñ Avropa kelecegi muzakere etilgen forum. 2004 senesinden 2013 senesine qadar YASnıñ er yıllıq körüşüvleri Yaltada Livadiya sarayında keçe edi. Rusiye Qırımnı ilhaq etkeninden soñ, konferentsiya keçirüv yeri – Ukraina paytahtı Kyiv oldı.
