Ukraina prezidenti Volodımır Zelenskıy ve Türkiye prezidenti Recep Tayip Erdoğan aprelniñ 10-nda olıp keçken körüşüvniñ neticesi olaraq beyanname imzaladılar. Vesiqanıñ ukrain tilinde metinini Prezident ofisi yayınladı.
Oña köre, Ukraina ve Türkiye arasında yüksek seviyeli Strategik şurasınıñ doquzıncı oturışınıñ neticesi olaraq taraflar böyle şeyler aqqında kelişti:
- «iqtisadiyat, ticaret, turizm, telükesizlik, mudafaa sanayısı, ilim, tasil ve gencler saalarında taraflar arasında işbirlikni ve koordinatsiyanı terenleştirmek içün küçlerni birleştirmek;»
- nazirler ve koordinatorlar seviyesinde Kvadriga formatında işbirlikni devem ettirmek;
- «Ukrainanıñ halqara seviyede tanılğan sıñırlarında topraq bütünligi ve suverenitetine destegini tasdıqlamaq»;
- «Qırım platforması»nıñ meydanğa ketirilüvini desteklemek;
- «muvaqqat işğal neticesinde vatanaları Qırımnı terk etmege mecbur olğan Ukraina vatandaşları, şu cümleden qırımtatarlarnıñ yaşayış şaraitini yahşılaştırmaq maqsadınen ortaq küçlerni» qvetleştirmek;
- terrorcılıq, ayırılıqçılıq ve aşırıcılıqqa qarşı küreşüvde işbirlikni ve küçlerni quvetleştirmek;
- ekstraditsiya aqqında talaplarnıñ tez işlevini temin etmek;
- bar olğanlarnı yekünlemek ve yañı ortaq leyhalarnı azırlap, mudafaa saasında işbirlikni daa da quvetleştirmek;
- kiriş protseduranı sadeleştirmek ve eki devletniñ vatandaşları içün seyaat imkânlarını yahşılaştırmaq ve qarşılıqlı turizimni rağbetlendirmek içün sıñır nezaretiniñ daa da tekükesizileştirilmesini temin etmek;
- Ukrainadaki Türkiyeniñ «Maarif» tasil fondunıñ faaliyetini desteklemek
Bundan ğayrı, Prezident ofisiniñ malümatına köre, aprelniñ 10-nda Ukraina delegatsiyasınıñ Türkiyege ziyareti çerçivesinde, Ukrainanıñ birinci hanımı Olena Zelenska eki ukraintilli sesli qılavuznı faaliyetke ketirgen – İstanbuldaki Galata qullesinde ve Ankaradaki Anadolu Medeniyetleri Muzeyinde. Merasim Türkiyeniñ birinci hanımı Emine Erdoğannıñ iştiragi ile olıp keçken.
Evel, Türkiye prezidenti Recep Tayip Erdoğan İstanbulda Ükrina prezidenti ile körüşüv vaqtında Ankara Qırımnıñ işğalini tanımama qararını bir daa tasdıqladı.
