Ukrayina prezidenti Volodımır Zelenskıy Saudi Arabistanğa kelip çıqtı. Bunı o, içtimayi ağlarda haber etti.
Ukrayina devlet başı haber etkeni kibi, o, Arap devletleri ligasınıñ sammitinde çıqışta bulunacaq ve şahzade Muhammed ibn Salman al-Saud ve diger arap liderleri ile körüşmek niyetinde eken.
Zelenskıynıñ sözlerine köre, muzakere etilecek esas mevzu siyasiy masbülerniñ, Rusiye tarafından işğal etilgen Qırımnıñ ve diger zapt etilgen topraqlarnıñ azat etilüvi ve qaytarıluvı olacaq.
"Qırımdaki basqılardan eñ soq zarar musulmanlar kördi", - dep qayd etti Zelenskıy. Qırımtatar halqınıñ Milliy lideri Mustafa Cemilev de prezident delegatsiyasınıñ terkibindedir.
Keçende Zelenskıy qırımtatar halqınıñ soyqırımı qurbanlarınıñ hatırasına abide tiklemege teklif etti.
1944 senesi mayısnıñ 18-nde sovetler rejimi qırımtatar halqını Qırım yarımadasından Orta Asiya ve Uralğa sürgün etip başlağan edi. Umumen 200 biñ insan sürgün etilgen edi. 40 yıldan ziyade insanlarğa vatanları Qırımğa qaytmağa yasaq edi. Çeşit malümatqa köre, yolda ve sürgün yerlerinde zorbalıq, açlıq, suvuq ve hastalıqlardan sürgün etilgenlerniñ aman-aman yarısı vefat etken.
Ukrayina Yuqarı Radasınıñ qararına köre, mayısnıñ 18-i Qırımtatar halqı genotsidiniñ qurbanlarını añma künü dep ilân etilgen.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
