Ukrayina prezidenti Volodımır Zelenskıy, Ukrayina zahireni ihrac etmege başlaycaq, Rusiyeniñ areketlerinden mesül ise BMT ve Türkiyedir, dep bildirdi.
"Biz er şeyni yaptıq, er şeyni azırladıq, bizim tarafımızdan koridor bar. Yılan adasını işğalden azat etkenimizni bilesiñiz, bu zahire taşıma koridorları ile bağlı telükesizlik nezareti içün pek müimdir. Qalğanı içün BMT ve Türkiye mesüldir, añlaşmadan soñ bile raketa darbelerini endirgen Rusiyeni nasıl nezaret etecekleri olarnıñ meselesidir", - dedi o.
Zelenskıy, Ukrayina Rusiyeniñ bildirgeni kibi zahireni Kıyiv degil de, Rusiye blok etkenini bütün dünyağa köstermek içün mıtlaqa ihrac etmege başlaycağını qayd etti.
İstanbulda cuma künü, iyülniñ 22-nde, Rusiyeniñ büyük istilâsı şaraitlerinde boğday ve diger azıq mallarınıñ Ukrayınadan Ukrayına Qara deñiz limanlarından çıqarıluvı aqqında añlaşma imzalandı.
Cumaertesi künü, iyülniñ 23-nde, Rusiye Odesa deñiz ticaret limanına «Kalibr» qanatlı raketalarınen ücüm etti. Bu aqta vilâyetniñ arbiy memuriyet vekili Serğiy Bratçuk Ukrayına Mudafaa nazirliginiñ «Yug» operativ komandanlığınıñ malümatına esaslanıp bildirdi. Onıñ malümatına köre, eki raketanı ava mudafaa quvetleri tüşürdi, daa eki raketa ise limannıñ infrastruktura obyektlerine ücüm etti.
Ukrayına Tış işler nazirligi ücümni takbih etip, Rusiyeniñ iyülniñ 22-nde İstanbulda Ukrayınadan zahire ihrac etilüvini bloktan çıqaracaq añlaşma çerçivesinde alğan mecburiyetlerini şübhege oğrata, dep qayd etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
