Ukrayina prezidenti Volodımır Zelenskıy, namzet statusı Ukrayina ile Avropa Birligi arasında munasebetlerde ciddiy adımdır, bu, yaqın kelecekte birleşmek niyetidir, dep bildirdi.
"Namzet statusını aluv nişanlanuv kibidir. Ukrayina ve AB munasebetlerinde ciddiy adımdır. Bu yalıñız dostluq, sevim degil, kelecekte bir bütün olmaq içün qatiy ve resmiy niyettir. Bugünden başlap Ukrayina üçünci memleketler içün irişim olmağan AB-niñ ayrı ve yañı programmalarınıñ faaliyetine qoşula bilir. Bugün biz bu aşalayıcı sözden qurtuldıq. Aslında Ukrayina iç bir vaqıt böyle birisi degil edi, amma resmiy ıstılaat bizni böyle aydlandıra edi. Biz bundan qurtuldıq. Biz üçünci, onuncı, yüzünci memleket degilmiz. Biz Avropa Birliginiñ kelecek azasımız. Bugün pek müim bir kündir", - dedi o.
Devlet başınıñ sözlerine köre, Ukrayinanıñ ögünde çoq iş bar ve akimiyetniñ bütün saalarınıñ ve cemiyetniñ birligi bizim muvafaqiyetimizniñ anahtırıdır.
İyünniñ 23-nde Avropa Şurası Ukrayinağa Avropa Birligine qoşlumaq içün namzet statusını berdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
