Ukrayina prezidenti Volodımır Zelenskıy Ukrayina özü istisal etken uzaq menzilli silâdan muvafaqiyetnen faydalanğanını bildirdi. Onıñ sözlerine köre, nişan 700 kilometr uzaqtan urulğan.
"Baş komandannıñ uruş meydanındaki vaziyet aqqında esabatını diñledim. Mudafaa ve qarşı ücüm areketleri. İleri areketimiz toqtamay. Mudafaa nazirligi - silâ ve arbiy yedeklerniñ teslimatı aqqında. Şu cümleden, bugünde ğayet kerek olğan zırhlı "medevikler" partiyasınıñ alınması. Strategik istisal nazirligi öz istisalımız aqqında. Özümiz istisal etkenimiz uzaq menzilli silânıñ muvafaqiyetli qullanması: nişam 700 kilometr uzaqtan urulğan", - dep bildirdi devlet başı.
Zelenskıy ne tür nişan aqqında söz ketkenini bildirmedi. Avgustnıñ 30-na keçken gecesi ise dronlar Ukrayina sıñırlarından 700 kilometr uzaqlığında olğan Rusiyeniñ Pskov şeerindeki ava limanına ücüm etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
