Ukrayina strategik sanayı naziri Oleksandr Kamışın memleket prezidenti Volodımır Zelenskıyge dron ve silâ çıqarılmasınıñ neticeleri aqqında malümat berdi.
''Biz istisalnı arttıracaqmız. Pek müim - yañı noqtalarnı qoşamız, silânıñ yañı örneklerini ögrenüv devam ete. Vatan içinde dronlar, silâ, tehnika istisal etilmesi - bu, tam manasınen, bizim serbestligimiz, ukrayinler ve Ukrayinanıñ serbestliginiñ istisal etilmesidir'', - dep qayd etti ukrayin lideri.
O, ukrayin mudafaa-sanayı kompleksi hadimlerine teşekkür bildirdi.
Zelenskıy şunı da qayd etti ki, Kamışınnıñ ayrı maruzası uzaq menzilli uçaqlarnıñ istisalı ile bağlı edi - o, oña ''mudafaa sanayı kompleksi içün esas vazifelerden biri'' dedi.
Bundan ğayrı, Ukrayina prezidenti NATO sabıq baş kâtibi Anders Fog Rasmussen ile Avropa-Atlantik regionı içün yañı telükesizlik mimarlığı üzerinde çalışqanı aqqında ayttı. Daa evel o, böyle bir subet aqqında Ukrayinanıñ NATO-ğa qoşuluvını ileriletmek içün çalışqan halqara iş gruppasınıñ taqdiminde bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
